「警鐘胸」名模Jessica C.（JC）與男模趙勁皓（King）昨日一同出席高踭鞋競跑大賽，JC透露跟男友在洛杉磯度過情人節：「我逗留咗兩星期，每日都似情人節！我送咗金戒指畀佢，但唔係求婚，我覺得佢都應該買一隻，不過佢冇！」又透露男友送她士多啤梨朱古力花做禮物，而她亦回贈「Big Kiss」。

穿着高踭鞋的JC與King手挽手作狀跑步，JC裝飾高踭鞋時更露出事業線！

JC

問到是否已計劃結婚？JC說：「未準備好，呢啲要嚟就嚟，但唔係依家！（佢係咪你真命天子？）呢一刻好掛住佢，可以話係囉！」

King則自爆情人節送驚喜給女友盧頌之：「我嗰日話有好多堂健身堂要上，佢發脾氣，其實我有時間陪佢，係專登激嬲佢，我一早喺健身房貼滿心形氣球同心形蠟燭，熄晒燈，叫佢過嚟搵我食飯，佢開門見到冇喊，係咁笑！我仲畫咗佢個樣送畀佢！（順便求婚？）冇咁快！我哋一齊三個月，剛過試用期，佢合格啦！我就一定合格！」