被老公陳奕迅封為「肯雅徐」的徐濠縈近年不時到世界各地出賽，昨日首次挑戰「全馬」更巾幗不讓鬚眉，以3小時52分佳績力壓同樣跑「全馬」的陳山聰及張致恒，她賽後興奮揚言要「生10個」當慶功！

「肯雅徐」跑到身水身汗，揚言造人成功的話下年就唔跑！

阿徐完成「全馬」後得知做出快時間，自己也嚇了一跳。

Eason陪練跑完成老婆心願，兩夫婦看來可全速進行「造人」大計！

陳山聰穿透明擋風雨褸保暖，做足準備。

鍾舒漫（左起）、張致恒、關智斌
張致恒跑到抽晒筋，好友關智斌在終點送吻作鼓勵。

張致恒

昨日陳奕迅（Eason）太太徐濠縈、陳山聰與張致恒（Steven）等出戰《渣打香港馬拉松2014》的「全馬」賽事，作為業餘跑手的「肯雅徐」阿徐估計以3小時52分完成，成為「全馬」藝人中的「冧巴溫」！賽後她興奮地說：「我手錶壞咗，朋友幫我計，首次跑『全馬』可以喺四小時內完成，已經係禮物，感覺好似當選港姐咁！」

老公陪練當禮物

阿徐指老公Eason早幾日曾陪她練跑，笑言已當是情人節禮物，曾到世界各地出賽的她又表示香港的路段確實跑得辛苦：「開頭衝出重圍好難，又要入三次隧道，出西隧嗰時都差啲抽筋。」問到明年可會再玩？阿徐即暗有所指說：「下年冇BB咪跑囉！（準備生第二胎？）跑完『全馬』咩都得，生多10個都得！」近年迷上跑馬拉松的阿徐曾到上海、台灣、日本及美國參加馬拉松比賽，其中在美國「半馬」賽事做出1小時52分佳績，20個明星代表中時間最快！

而陳山聰穿上運動背心搭透明擋風雨褸現身，潮爆Look做足準備！最後他以4小時27分完成賽事，受訪時指西隧路段最辛苦，左腳後腿更有抽筋，要「啪」四次鹽「救肌」，問到是否掛住拍拖而疏於練跑？山聰說：「唔關事！我去咗三次洗手間，亦有搵按摩膏搽腳，其實應該可以再快啲。」

張致恒九度抽筋

至於Steven則以5小時34分衝線，賽後透露全程抽足九次筋，需要在西隧休息15分鐘「回氣」，期間被跑手認錯是好友關智斌（Kenny）！另外，Steven舊愛鍾舒漫與Kenny挑戰10K賽事，Kenny賽前取笑Steven：「希望閂閘前見到佢，唔使坐巴士！」