所謂孖女孖心肝，AOA之間真的有心靈相通，大Ann說：「有次細Ann出去拍劇，我喺屋企突然間暈船浪，原來細Ann拍劇暈船浪，我喺屋企都會覺得暈，但佢一落船我就冇嘢。」細Ann亦說：「試過以前佢去北京表演，我個心突然唔舒服，原來佢整親隻腳搞到流晒血。」除了心連心，AOA一樣的外表亦鬧出不少誤會，大Ann憶述：「細個嗰陣，媽咪分唔到我哋，結果幫我沖咗兩次涼，但冇幫佢沖，後尾諗到喺隻腳度綁絲帶認我哋。」

大Ann（左）、細Ann
幾乎所有雙胞胎小時候都會被打扮得一模一樣，AOA亦不例外！

如今AOA離鄉別井來港闖天下，二人在生活上互補不足，即使家人不在身邊亦不愁寂寞，細Ann說：「我哋平時會分工，我負責煮嘢食，搞清潔，同埋做啲男仔頭嘅嘢，例如電腦壞咗我會拆嚟整，可能我細個男仔頭啲。」問到會否掛念在廣州的父母？大Ann說：「我哋日日會傾電話，雖然會思鄉，但一有時間都會返去探佢哋。」