孖女組合AOA姊妹檔闖樂壇，能歌善舞的她們原來從小已經表演欲極旺，細細個已經享受舞台演出，可謂為表演而生！感情要好的姊妹兩人除了樣貌「倒模」一樣外，更是心靈相通，名副其實的是孖女孖心肝！

大Ann、細Ann！

大Ann（右）和細Ann由細到大，生活、工作都孖住上，無分你我！

驟眼睇，的確難以分辨大Ann（右）和細Ann。

大Ann

細Ann

姊姊吳燕珊（Annelle）與妹妹吳燕菁（Annice）組成的歌唱組合AOA，挾着「最美麗雙胞胎」之名從廣州殺入香港樂壇，至今推出兩張EP。於舞台上能歌善舞的這對姊妹花，細細個已星味十足，年僅幾個月時已被星探發掘拍「裸體」廣告，姊姊大Ann說：「嗰陣幾個月大，已經有人搵我哋拍廣告，嗰時都好性感ｏ架，上身冇着衫。」正所謂三歲定八十，隨着年歲增長，AOA的表演欲愈來愈大，大Ann回憶處女作是在幼稚園：「4歲第一次上台表演，雖然唔係主角，但覺得全世界好似望住我咁。之後喺幼稚園畢業禮上做主持，嗰時唔識字，啲稿係靠爸爸媽媽逐隻字逐隻字教我哋讀。」

13歲曾棄出碟

之後姊妹二人不斷有演出機會，講到真正投入娛樂圈，要數到大學時期，妹妹細Ann說：「係一個機緣巧合，讀大學嗰陣有個新節目想搵孖女做主持，我哋去Casting。爸爸媽媽都冇反對，而且由細到大係佢哋帶我哋去學跳舞，知我哋係認真去做，所以讀大學嗰四年都做主持，中間仲有機會去拍吓劇。」

除了做主持及演戲，唱歌都是二人興趣，而早於十多年前二人更曾有機會出碟做歌手：「之前有幾次機會，第一次係13歲，嗰次參加歌唱比賽，香港嘅唱片公司睇中咗我哋，但我哋覺得應該讀書為先，所以放棄機會；第二次係18歲讀大學，嗰時知道自己想要咩，但邀請我哋嗰間香港公司方向同我哋唔一樣，所以拒絕咗，想做住主持累積經驗先；後尾遇到呢間公司覺得好夾，所以就簽約出道。」

「絕交」唔過一星期

雖然二人情深，但原來都會有不和的時候，細Ann說：「我哋會嗌交，因為會諗點解你唔明我諗法，不過我哋唔會冷戰。」一旁的大Ann則自爆原來曾單方面與妹妹絕交：「我試過喺日記度寫過以後唔睬佢，但一個星期後都睬番佢。」

即使偶有小爭執，但二人「情比金堅」，更絕不會爭仔，大Ann說：「我哋冇試過鍾意同一個男仔，但如果鍾意同一個，我諗我哋會讓畀對方。」

後記：照鏡一樣！

兩姊妹以組合形式出道，好處莫過於身邊猶如多了一位「私人助理」。採訪當日時間緊迫，大Ann和細Ann如照鏡般幫對方化妝、整理衣服，互相幫助之下極速Set好靚樣做訪問及拍照，十分方便。