薛家燕及湯盈盈前晚出席收視高企的劇集《新抱喜相逢》大結局飯局，二人全程表現風騷，當中以貼身裙登場的盈盈更「肚凸凸」疑似有喜，而家燕姐則自爆會Sweet爆過情人節！

腰圓肚凸的盈盈，講起追多個即笑騎騎，實在惹人懷疑！

盈盈疑似有喜，家燕姐即刻摸吓先！

家燕姐獲女兒的緋聞男友王梓軒（右一）拜年，即時笑到見牙唔見眼！

由「收視福將」家燕姐、湯盈盈、滕麗名及王梓軒等主演的熱播劇集《新抱喜相逢》大結局平均錄得29點收視，勁升10點之餘，最高收視更達30點大關！

前晚一眾演員到九龍灣出席劇集的大結局飯局，期間盈盈被麥長青取笑「有身孕」，她自爆想追多個：「係咪話我肥咗！（有咗？）唔知呀！（一、兩個月後先可以恭喜你？）到時睇吓點啦！（情人節送個B做禮物？）Maybe！Trying！（追緊？）都想，但又想拍劇。如果真係有第二胎就一定會減產，到時等老公養！」其老公錢嘉樂則透過短訊回覆：「佢哋（麥長青）玩吓啫！如果真係有咗，一定會公布！」

家燕姐過二人世界

此外，問到心情大靚的家燕姐情人節有何安排？蜜運中的她稱要賞花燈：「梗係好溫馨、好Sweet咁過啦！去賞吓花燈！（男友有咩表示？）傾緊買遊艇，到時二人世界會好開心！」另外，無綫節目《愛情來的時候》收視上升，其中由鍾嘉欣主演的《愛》更勁升6點，成為《愛》中收視最好的單元。