陳靜（DaDa）日前誤撞朋友牙齒令額頭受傷而入院縫了十三針。昨日她為電影《Z風暴》開工，與古天樂在烏蛟騰拍攝追車場面。陳靜右邊額頭雖仍貼着膠布，但以頭髮遮掩，她說：「傷口已經冇大礙，唔係好痛。（有疤痕？）都唔怕，頭髮都遮到。其實傷口一日比一日好。之後仲有啲被追殺戲份，應該都應付到。有同劇組人員單咗聲。成件事正面啲咁睇，當係新一年鴻運當頭。」首次與古天樂合作的她又說：「佢都有慰問我傷勢，好友善。（城中筍盤？）係呀！但自己只係積極工作，呢個係我大前提，唔諗其他嘢！」

DaDa撥起頭髮展示傷勢。

古仔埋位準備拍攝追車場面。

另外，談到今屆金像獎，入圍競逐「最佳男主角」的古仔說：「入圍已經好開心，入圍嘅都係影帝級人馬。我對各人都有信心，自己就冇。」對於張家輝並非憑同一部電影《掃毒》獲提名，古仔大讚對方在電影《激戰》中演得很好：「如果佢兩部都入圍男主角，反而會分薄票數。」對於在賀歲片中的演出受到讚賞，古仔說：「我都未入場睇。電影公司要搞慶功啦！不過就算請去旅行，我都冇檔期。」而同場的藝人還有曾國祥、歐錦棠及張松枝。