周潤發與謝霆鋒昨晚出席電影《賭城風雲》慶祝活動，宣布票房大收，發哥笑言不介意下次與霆鋒玩斷背，還讚對方好咀！霆鋒則透露情人節要出埠開工。

發哥與發嫂出席活動，恩愛爆燈。

霆鋒提議發哥拎槍重現Mark哥風采。

發哥（左起）、姜皓文、袁嘉敏、王晶、梁敏儀、張晉及霆鋒團拜慶祝《賭》片票房大收。

昨晚影帝周潤發與「發嫂」陳薈蓮、謝霆鋒、導演王晶、張晉及伍允龍等出席電影《賭城風雲》團拜，宣布截至前日電影在港票房逾3,000萬港元，內地則大收約3億3,000萬港元！心情大靚的發哥、霆鋒與王晶在台上放笑彈，霆鋒自爆現時147磅，令逾150磅的發哥笑言要再減肥，王晶提議下部戲兩人可拍《斷背山》，發哥即笑說：「咁Chok嘅男仔我都鍾意，而且佢好咀呀！」

指影帝爭崩頭

染了金髮的霆鋒表示最想發哥拿槍重現Mark哥風采，問到早前是否到新加坡探兒子，他只說：「去咗好多地方。」問到金毛Look有否嚇親兒子，他拒絕回答，並指不想講家事，又解釋新形象是為了飲食節目作準備，本月14日會到澳洲工作，提到當日是情人節，他詐傻說：「係喎！都要做嘢啦！有拖拍會話你哋聽。（依家有？）冇！」

發哥對票房大感滿意，提到主演的兩套賀歲片已收逾10億港元，他笑說：「都唔關我事，唔到我袋，都係嗰條友（指太太）拎。」對於霆鋒提議他再拎槍，發哥笑說：「我成日叫佢諗劇本，佢死唔諗咋嘛！（想拍槍戰？）佢都同周杰倫拍過《逆戰》，可以搵番佢，不過AK47對我嚟講太重，掌心雷OK！（仲想拍咩題材？）唔使講對白，做啞，未做過呀！（返TVB拍劇？）如果每日有八、九個鐘休息，角色適合都有得諗嘅。」

提到今屆金像獎影帝提名，發哥認為競爭激烈，並談到梁朝偉及黃秋生：「葉問對葉問，兩個都好高！冇咗個台灣影帝（李康生）好啲，張晉就提名男配角，佢嚟咗香港咁耐，有部戲大展身手都期待佢有獎。」其後發哥搞笑唱歌完結訪問：「恭喜恭喜恭喜你！我好肚餓呀！」笑爆全場！