「無綫咪神」高海寧（高Ling）前晚在微博表示與「財神爺」合照，豈料旋即被網友指她點錯相，「鍾馗當財神」！高Ling見網友反應激動，即急急澄清純屬講笑，免得誤會愈深。

高海寧日前曾與扮財神的安德尊出席活動，點會唔認得財神o架？

高海寧

今天是大年初一，不少藝人都希望新一年能夠招財進寶、搵錢搵到手軟！

不過未知是否急於求財，高Ling竟將「捉鬼大師」鍾馗誤當財神，前晚在微博上載二人在化妝間的合照，並留言：「今晚收爐，喜遇『財神爺』！馬年我一定發過豬頭啦！哈哈！」相中的她穿上傳統旗袍，展露甜美笑容，手臂緊貼對方手臂，似乎想沾「偽財神」的旺氣。

網民激動更正

其實，鍾馗是古代民間傳說人物，專責捉鬼降魔，實在與財神「大纜都扯唔埋」！不少網民得知高Ling居然點錯相，都大為驚訝，除留言附上O嘴表情符號外，更提醒她：「呢個係鍾馗，係捉鬼呀！」、「似鍾馗多過似財神喔！」

高Ling昨日接受訪問，對於「鍾馗當財神」一事，她表示純屬誤會：「我梗係知嗰個係鍾馗啦！其實佢係隔籬劇集《無雙譜》其中一個角色嚟，好多人嗰晚見到佢都有捉住佢影相！我喺微博都特登用引號去括住『財神爺』三個字，諗住講吓笑，但冇諗過啲網友反應咁大！」