神級影帝周潤發坐擁至少十億港元身家,但生活依然簡樸,日前發哥在北京接受《東網》獨家專訪暢談金錢觀,自爆不追捧潮流,認為心靈富足比財富更重要。對於有傳打算身後捐出全副身家,發哥說:「我暫時保管住一陣之嘛!捐啦!捐晒佢!」淡泊名利的心態令人折服!

發哥受訪時大談恬淡生活,更揚言願捐出全副身家行善!

節儉的發哥不時以巴士及鐵路等公共交通工具代步。

現今香港物價高企,升斗市民為追通脹個個有壓力,但坐擁逾十億身家的影帝周潤發仍堅持過慳家生活,日前他在北京接受《東網》專訪分享金錢觀,表示拍戲飾演過皇帝、英雄及富豪,歎盡「華衣美服」及「珍饈百味」,反而最享受反璞歸真的生活,自爆仍在使用近十年前的手機型號,沒有智能手機、名車司機,仍會跟普羅大眾逼港鐵搭巴士的發哥幽默地說:「啲人問我點解仲搭地鐵,我話有乜所謂?地鐵有百分之九十嘅人耷低頭(玩手機),根本抬唔起頭望我,鬼知我入咗車廂咩!簡直如入無人之境啦!係咪呢個世界人有我有,人要我又要?要諗清楚,有冇咁嘅需要?我冇智能手機,係我唔需要,我用個電話打出去,話畀人知我返緊嚟食飯喇喎!收線!」

按社會需要奉獻

發哥在賀歲片《賭城風雲》中的「新賭神」石一堅將贏得的錢捐出行善,現實中的發哥同樣充滿善心,提到有傳打算身後捐出所有身家,發哥認為「錢財身外物」,計劃「裸捐」幫助貧苦大眾:「我覺得啲錢都唔係我嘅,我暫時保管住一陣之嘛!捐啦!捐晒佢!到時睇吓邊度有需要咪捐去邊囉!到最後一刻作決定,就要視乎當時社會嘅需要。」

社會變得愈來愈物質主義,孝順的發哥仍毋忘母親教誨,認為節儉可改變命運,建議大家養成儲蓄習慣:「我阿媽有句說話係啱嘅:『將你份人工儲起10%。』依家賺一萬蚊好易,但儲一萬好難,生活開支大嘛!依家係娛樂太多,不停令人使錢,冇令人覺得儲錢係好習慣,好似阿Sir(邵逸夫)百年歸老,追思會叫你哋唔好做乜,嚟鞠個躬就得,呢啲就好囉!唔係叫你孤寒,但節儉係美德。」

搭港鐵勝在自由

神級發哥仍不時落區跟街坊吹水,他笑言在街上看盡人生百態,非常有趣:「呢種生活方式適合我,我有架車泊喺度,要行到冇雷公咁遠拎番,嘥時間呀!我請個司機,我心唔舒服,牽掛有個人喺度等我,呢種係煩!我自由自在,搭地鐵、的士去到邊度咪周圍行吓、影吓相,買吓嘢食又好,睇吓風景又好。」