由電視圈紅到影壇的周潤發，多年來仍有收看母台無綫的劇集，他日前在北京接受《東網》獨家專訪時表示不排除再與無綫合作，又論盡上位小生，並點名讚黃宗澤隨時彈出！狀態大勇的發哥又指未想過退休，會繼續演戲直至記不到對白為止。

關注娘家無綫動向的發哥，不排除會回巢過劇癮。

演出生鬼的黃宗澤常放笑彈，難怪獲發哥青睞兼點名力讚！（資料圖片）

國際巨星周潤發於70、80年代拍下《網中人》、《上海灘》及《千王群英會》等膾炙人口的無綫劇集，其後紅爆影壇，勇奪三屆香港電影金像獎影帝，但他一直有留意娘家無綫的狀況。他日前在北京接受《東網》專訪時笑言閒時會睇足無綫兩線劇，更不排除再出山：「舊時喺度嗰陣冇睇自己做戲，依家得閒咪做觀眾睇囉！（仲有冇機會返TVB？）視乎有咩Offer、劇本。（拍劇？）有乜所謂呀！如果劇本好又休息時間夠，可以應付到咪OK囉！」對於近年香港電視業被韓劇及內地劇威脅，發哥指仍會支持娘家無綫：「製作係流水作業咗，但依家（電視業）咁慘，你仲唔支持？支持佢！係我母台嚟嘛！」

發哥又論盡電視小生，睇好陳豪、馬浚偉、黃宗澤（Bosco）、Bobby（歐陽震華）及黃浩然，更點名力讚Bosco有望今年彈出：「嗰個阿澤（黃宗澤）都係時候出嚟啦！TVB剩番小生唔係咁多，喺電視係要好長時間浸淫！」

阻人收工就唔撈

成功減走30磅的發哥狀態大勇，今年同時有兩部賀歲片《賭城風雲》及《西遊記之大鬧天宮》上映，他直言「活到老、演到老」，沒想過退休：「呢樣要睇觀眾囉！同埋如果有日我記唔到對白，阻住人收工，我就唔拍喇，但我冇諗，上天安排我係做呢樣嘢，咪做到做唔到嗰日為止！」提到曾勇闖荷里活，他表示仍考慮再赴美「取經」，認為每次都有得着，但基地依然是香港：「始終係生活慣咗嘅地方，而且方便呀，唔去第二度喇！」

《東網》遠赴北京獨家專訪影帝周潤發，今日播出《發哥專訪4》，他繼續滔滔不絕分享人生閱歷，大家密切留意！