唱得跳得演得的組合Super Girls，五個女仔性格特質各異，要她們每人用一個英文字來形容自己，她們又會怎樣解構呢？

Super Girls五位成員各有特色，各自於隊中發揮不同作用。

Heidi

Cheronna

Aka

Jessica

Yanny

感情要好的Super Girls亦會為工作鬧交，但強調不會嬲「過夜」。

Unique（唯一）

Heidi認為Super Girls五個女仔中，每個人的性格和形象都不同，而可愛教主一職便落在她身上：「五個人入面我係比較嗲嗰個，當然對住唔識嘅人我唔會嗲佢啦！好多人覺得我可愛，其實要我好Man好Cool都得。我覺得每個人都有Cool同可愛嘅時候，可能我可愛嗰邊比重多啲啦！」Heidi是成員中年紀最小的，就像溫室小花一樣被大家細心呵護：「我係最細個，冇佢哋咁成熟，處事方面佢哋會Lead住我，我都慣咗聽佢哋意見多啲。佢哋好錫我，好多時我唔需要諗好多嘢，佢哋決定咗我就Follow，所以我好相信佢哋。」

Passionate（熱情）

擁有健康膚色的Cheronna一看便知是陽光女孩，她用熱情如火形容自己：「我對好多嘢都好熱情，無論係唱歌、做戲、跳舞、對朋友、對人，我好似一團火咁燒晒身邊人。只要我覺得同你啱玩，就會咩都講晒畀你聽，好易信人，當然亦試過因為咁而畀朋友呃。」火能溫暖人心，稍有不慎卻會燒着火頭，Cheronna亦曾因太熱情而嚇走朋友：「依家我會提醒自己唔好太熱情，我試過鍾意一個女仔朋友鍾意到好似拍拖咁，咩都一齊做，到最後佢避開我，我好似失戀咁，依家諗番都好唔開心，我諗係太熱情嚇走咗佢。」

Soul（心靈）

身為Super Girls的隊長，Aka可算是組合中的靈魂人物，不過Soul對她來說有另一種意義：「好慶幸我嘅人生入面有好多Soul Mate，全部都勁Support我同明白我。做呢行我畀好大壓力自己，成日都會匿埋諗呢樣嗰樣，有時好小事都會唔開心，當我一喺WhatsApp個Group講完，佢哋真係會即刻出嚟見我，或者送吓嘢畀我氹我。」人生得一知己死而無憾，Aka感激早已遇上一班真心好友：「好多時我唔使多講，或者我未講完嗰句，佢哋已經明白我諗緊咩，仲會幫我分析埋。我覺得咁樣好重要，如果人生冇人明白你，冇人企喺你立場幫你、為你好，咁樣好悲哀，所以我有佢哋呢班Soul Mate真係好好。」

Elegant（優雅）

外表斯文的Jessica坦言希望做個有氣質的高貴女孩：「由細到大都希望做個好Elegant嘅女仔，好羨慕嗰啲着住條白裙彈鋼琴、豎琴嘅女仔，會有爸爸媽媽Plan好晒由細到大條路，可惜事與願違。」自小父母離異，令Jessica對婚姻和愛情失去信心：「我個人好冇安全感，覺得好多嘢唔會天長地久，拍拖會好多疑，明明男朋友冇做過啲咩，但我會不斷幻想。但我仍好嚮往有個美滿家庭，想我第時啲小朋友望落去係Elegant嘅。」她又以舒淇為目標：「好想做到佢咁，每次出任何Event都大方得體，我希望我會做到啦！」

Romantic（浪漫）

擁有白雪雪皮膚、大眼睛、瓜子臉的Yanny是典型美女，以為她是弱質纖纖的小女孩？她會教你不可以貌取人：「我個樣畀人感覺好乖好靜，啲男仔預期我係小鳥依人，識咗就會發覺我一啲都唔浪漫。試過前男友喺情人節準備咗蠟燭路同一大紮玫瑰花，我接到嗰時個樣呆咗，其實我好開心但唔識表達，只係好冷靜咁講句多謝，佢以為我唔開心。」Yanny笑言為免做老姑婆，要向Heidi學習：「我覺得唔識浪漫會冇咁多情趣，好多男仔都鍾意嗲啲嘅女仔，所以我多咗留意點樣嗲啲，依家見到Heidi講嘢嘅談吐，我都會學佢講一次。」

好姊妹冇隔夜仇

有女生的地方便有是非，不時有女子組合傳不和，成軍年多的SG可會是個例外？Heidi笑說：「唔好話之前，依家都仲磨合緊。」Yanny搭嘴說：「兩姊妹都會鬧交啦！」言下之意五人經常鬧交？Cheronna說：「永遠係為咗工作鬧交，大家嘅意見唔同，就會覺得點解我要聽你講？但一定會拎出嚟講，唔講就會變心病，不過講完就冇嘢，唔會隔夜，如果唔係會好唔開心o架！」