「宇宙最強」甄子丹昨日現身香港迪士尼樂園，廣受大人細路歡迎，更一度被逾廿名小學生包圍！子丹在新片《西遊記之大鬧天宮》中演美猴王，得以廣納小朋友Fans，他對此感到高興：「以前我啲打戲世界裏只有大人，但拍《大鬧天宮》嘅美猴王令我名正言順可以叫小朋友睇戲，呢套可以話係中國版嘅《功夫熊貓》！我個仔依家成日要我講Monkey King（孫悟空）嘅故事，我會帶埋我啲仔女去睇首映。（首次咁做喎？）係！但唔係特登，適當場合做適當嘢。」

子丹（左）架子全無，與樂園的演藝人員一同Chok甫影相。

子丹見到小朋友樂在心頭，即時蹲下逗他玩。

子丹被近二十名小學生「包圍」合照，非常親切。

提到獲內地封為六小齡童（內地擅演孫悟空的著名演員）的接班人，子丹說：「多謝大家支持！我拍之前睇咗好多六小齡童嘅演出做參考。」

此外，他在有線節目《電影蒙太奇》中大呻為新片造型上妝和落妝花了逾一千小時：「簡直係人生、肉體兼靈魂上最大折磨！為咗似真猴子，我幾乎所有鏡頭都半蹲住嚟拍，行路都屈住個膝頭，成身肌肉好痛！」更稱幾乎為此崩潰！另一邊廂，又有指他當選「金掃帚」最令人失望男演員，據悉內地有報道為他平反，指有關選舉不公平，而且最後結果要3月才公布。