華姐決賽今晚舉行，香港代表(5)陳凱琳雖然為排練只睡了三小時，但仍憑靚樣成為大熱，並打算憑吹笛殺出重圍。而(10)張雨晴竟向(8)張雅旻批（月爭）兼反白眼，鬥到出面！

(5)陳凱琳（香港）
三圍　31、22、32
陳凱琳參選港姐時已憑靚樣奪冠，未知能否再下一城戴上華姐冠軍后冠？

(16)鍾熠（溫哥華）
三圍　33、23、35
鍾熠笑容甜美夠Charm！

(9)黃婷麗（蒙特利爾）
三圍　34、24.5、35
中、意混血兒黃婷麗身形高挑，但穿上高衩泳褲甚為牙煙。

(14)戴婕菲（悉尼）
三圍　34.5、24.5、34
戴婕菲外貌清秀，身材均稱，勝在平均分高。

(13)張佩雯（右）最想與眾佳麗做朋友，難怪獲選「友誼小姐」。

頂心（月爭）

出手撥
(8)張雅旻被(10)張雨晴出月爭遮晒上圍，梗要出手撥開啦！

扮冇嘢
被發現出（月爭）的張雨晴只好放低手，若無其事與張雅旻合照。

上圍澎湃的(3)區思敏穿上比堅尼後自信十足。

無綫將於今晚舉行《2014國際中華小姐競選》決賽，16位佳麗昨日穿上兩件頭泳裝綵排，當中以(3)區思敏、(11)李嘉嘉及(5)張佩雯的上圍最「凸」出，來自芝加哥的區思敏更「賣大包」，上圍堪稱全場之冠！張佩雯則成功托出事業線，不過兩女屁股均現「橙皮紋」，認真大煞風景。雖然選美強調友誼第一，比賽第二，卻有佳麗明爭暗鬥，大合照時(10)張雨晴先向(8)張雅旻批（月爭），後者隨即醒目地用手撥開，張雨晴見狀則反晒白眼，火藥味濃！

(13)奪「友誼小姐」

本土大熱(5)陳凱琳（Grace）雖然身材欠睇頭，但輪廓深邃的她最為省鏡，日前她率先勇奪「現場觀眾至Like表演獎」，到場撐愛女的陳母更感動落淚，昨日Grace透露正為決賽積極排練，前晚只睡了三小時，今晚會再次表演吹笛及獻唱《我的驕傲》：「才藝表演想做好啲，因為上次未達理想。（準備紙巾畀媽咪？）我叫咗媽咪唔好再喊。」提到凌晨練歌影響室友睡眠，Grace笑說：「冇啦，講咗12點前就停。（同房(6)黃之豫投訴你？）佢不知幾咁鍾意聽我吹。」與家人關係良好的她表示家人到場支持令她更放鬆，她更獲多位佳麗睇好。

一眾佳麗即場投選「友誼小姐」，結果由來自新加坡的張佩雯贏得，她自言首次在比賽中奪獎，指與各佳麗做朋友感覺很溫馨，對於以往「友誼獎」得獎者難入三甲，她卻表示對自己有信心：「贏唔係最重要，最重要係得到友誼同攞經驗。（有信心奪冠？）每個人都有機會！自己都要努力，因為我唔識講廣東話。」她坦言心情緊張，但會以平常心看待。