已為人母的楊千嬅最近屢傳再度「有餡」，雖然她已多次否認，但卻自爆與老公有計劃再添丁。至於泳兒則趁新一年來臨，隔空向男友詐嬌，揚言想收到鑽戒作禮物。

以Tude Dress上陣的楊千嬅險些仆親，嚇得她落台時要人扶實（下圖）。

泳兒與鍾偉強Jam歌，氣氛High爆。

王君馨穿短裙高歌，惹來不少粉絲尖叫。

楊千嬅與泳兒等歌手前晚與歌迷倒數迎新年，身穿鬆身長裙的千嬅甚有孕味，腳踏高踭鞋的她在台上不慎Kick－Kick，嚇到她不停傻笑，當被司儀問到是否有喜？千嬅笑說：「唔好咁敏感啦！」

雖然否認有喜，不過千嬅就自爆與老公丁子高已有生B共識：「我哋都想生多個陪Torres，不過嚟緊有大Project，或者明年啦，四十歲要起勢追呀。」問到千嬅有家庭後，可會減少接節日Job？她即自認專業：「我係好有責任感嘅Artist，如果唔係都冇老闆肯簽我啦，我會自己分配時間嘅。」千嬅笑言自從誕下Torres後，生活更有節奏：「好似今日咁，我要氹完個仔瞓先出到嚟，依家係貓頭鷹時段，不過都頂唔到幾耐。」

泳兒想收鑽戒

同場的泳兒則大呻未試過與現任男友倒數迎新年，問到可想收到男友送贈的過年禮物？她隔空向男友明示：「最想收到可以戴喺手嘅嘢，一生一世呀！（想收結婚戒指？）其實手繩都可以戴一世嘅，不過戒指都唔拘呀，幾多卡都冇關係。」而王君馨則表示雖然與男友拍了八年拖，但暫時則未有結婚的打算。