前晚多位紅星包括草蜢、苟芸慧、黃翠如、胡定欣及鄭俊弘等齊集上水廣場，與大批市民迎接2014年，又大玩遊戲送禮物，氣氛熱烈！因病休息一段時間的苟芸慧狀態回勇，更穿上低胸裝谷出V Shape咪咪，非常煞食！

苟芸慧手臂雖然仍見圓潤，但精神飽滿又谷出V形胸，狀態回勇！

翠如BB行Catwalk時向粉絲Say Hi，心情大靚！

獲Fred熱情抱抱，小粉絲面都紅晒！

心口開窿的胡定欣，盡顯嫵媚之態！

新鴻基地產代理租務部助理總經理劉文豪先生（後排左五）與多位高層及紅星迎接2014年，現場逼滿Fans，非常熱鬧。

葉俊亨（左起）、林穎彤、苟芸慧、黃翠如、范文雅和周子揚齊齊華麗登台。

多位紅星前晚雲集上水廣場出席《華麗倒數派對》，吸引Fans逼爆三層樓，場面熱鬧！久未露面的苟芸慧與黃翠如、林穎彤及華姐范文雅身穿低胸晚裝行Catwalk，傳抑鬱的苟姑娘精神甚佳，不時笑晒跟Fans揮手，雖然其手臂仍見圓潤，但已比早前清減不少，上圍更谷出V形胸，甚有睇頭！聲沙沙的她表示患上感冒，但仍大方講述病情：「其實我唔覺情緒有事，但個人一直好腫，於是睇醫生同返加拿大休養，原來甲狀腺出問題，依家食咗個幾月藥，會Keep住食到控制到。」又表示沒有磅重，但開心就會瘦，這些經歷令她變得更堅強！今年她會努力拍劇收復失地，提到有傳將400萬元交予母親買樓，她說：「錢不嬲畀媽咪管，可能佢拎去投資，我冇理。」同場的鄭俊弘（Fred）、周子揚及馬來西亞歌手葉俊亨齊獻唱，有幸被Fred抱的女Fans更怕醜得滿面通紅，非常搞笑！Fred希望今年可圓出碟及開騷夢。連續兩年在港倒數的葉俊亨則大讚氣氛超好，希望可在港舉行音樂會。

翠如嘲洪永城香雞腳

另一「BB」黃翠如同樣深受市民歡迎，今年會繼續拍劇及主持旅遊特輯，但挑戰很大：「節目同世界盃有關，但我唔識足球。（向拍檔洪永城求教？）佢都唔係好叻！你睇佢香雞腳！」問到新一年會否想找個男友？她笑說：「唔強求，但有都好呀！」至於胡定欣表示月內會獨自到美國遊學一個月。提到主演劇集《貓屎媽媽》首周收視欠理想，她說：「撞正聖誕同新年，一早預咗！不過內地收視同網上點擊率都幾好。」