張智霖（Chilam）與黃子華因視帝之爭盛傳不和，前晚Chilam竟失驚無神現身子華主持的飯局贈興，兩雄High爆鬥酒，還來個「世紀合照」，粉碎不和傳聞！　

因視帝之爭引出連串是非，子華（左）和Chilam一攬碎不和，成為「最完美的結局」。

Chilam與子華及《My》劇台前幕後大合照，搭晒膊頭幾融洽喎！

黃子華憑無綫熱爆劇《My盛Lady》擊敗大熱的Chilam，榮登視帝。而奪得「最受歡迎電視男角色」的Chilam，致詞時的「義氣仔女論」被指有欠風度，更傳出他與子華不咬弦。前晚子華趁《My》劇大結局與台前幕後飯敍，Chilam以神秘嘉賓身份「踩場」，兩雄全無芥蒂碰杯鬥酒，又攬實合照。

是次兩雄相聚，全拜無綫高層梁家樹（Tommy）所賜，前晚他約Chilam出席飯局，並叫對方來「踩場」，Chilam更買了一支靚酒當「賀禮」。子華昨日受訪時說：「我最介意啲人話我哋不和，我認靚靚（袁詠儀）係表妹！今次只不過係喺唔同嘅賽制底下，形成唔同嘅結果啫！（傾咗啲咩？）冇特別解釋過件事，今次見面已勝過千言萬語！」他又指曾與靚靚通電話，提起傳與Chilam不和，靚靚即豪氣地笑罵：「黐線咩﹗」

醉High賴低座駕

Chilam昨日亦笑說：「我同子華飲吓酒、傾吓偈囉！大家都有傾過想合作嘅，但未知咩形式囉！有可能電影、電視劇，甚至其他方面，梗係期待啦！我同Tommy講，話子華演得好好，佢攞獎我心服口服！」他又笑言昨晚將座駕停泊在銅鑼灣，事後跟Tommy過海，想不到最終喝醉：「我依家由屋企（淺水灣）行山路到銅鑼灣攞番架車，咪當做運動囉！」

此外，「蝦頭」楊詩敏在前晚的《My》劇大結局中以逼爆西裝、熱褲造型扮徐子珊，更在梳化上瞓身誘子華，甚為爆笑！