馬國明昨日與一班中學生進行足球友誼賽，期間雖然兩次失手仆倒，但最後仍平手收場。對於視帝之爭，馬國明坦言一切平常心，惟未能接受裸露及掛綵帶拉票！

馬國明

馬國明踢波失手，兩度摔倒跪地，要用手撐番起身。

羅仲謙同樣踢到趴喺地，球技認真麻麻！

羅仲謙

黃智雯、岑麗香及朱千雪等組成啦啦隊打氣。

馬國明、羅仲謙、岑麗香及黃智雯等昨日到中學宣傳新劇《On Call 36小時II》，與一班學生進行足球友誼賽，一眾女演員則做啦啦隊。自言是「波牛」的馬國明，落場後兩次摔倒，認真失策，幸而最後能以3：3打成平手。

早前在台慶夜奪得「藝員眼中的男藝員」的馬國明，被問到對月中舉行的頒獎禮視帝可有信心？他笑說：「都會拉吓票！（有個勁敵張智霖喎！）咁我都冇放棄，但諗唔到點拉票，唔通要我除衫去彌敦道拉票，定係掛住綵帶好？最實際都係宣傳到套劇，最後衝刺嘛！（有冇信心？）平常心，不嬲都係呢個心態，希望食住個勢落力宣傳！」對於有觀眾投訴他與楊怡戲份少，他說：「之後會多啲，個個人都幾均等，今輯多咗好多人同線，又成30集，但最後我哋都係Happy Ending。」

岑麗香爭女配未夠班

剛在馬來西亞奪得「最具潛質女藝員」的香香，在台慶頒獎禮則有份角逐「最佳女配角」及「飛躍進步女藝員」，她笑言能躋身入圍名單中已感開心，無論最後有獎與否都會做好自己：「喺馬拉嗰邊見到其他提名人都冇去，心諗如果我去但冇獎真係好瘀！其實『女配角』我未夠班，都係陪跑，睇好韓馬利、江美儀同羅蘭，『飛躍』就平常心啦！」