黃子華、徐子珊、高海寧和陳敏之昨日為劇集宣傳，無綫為他們製作四個一比一人形攬枕，問到會否擔心粉絲對攬枕有另類幻想時，打扮性感的高海寧表示不會亂諗，但子珊卻大呼怕怕！

看似弱不禁風的子華抱起子珊，子珊即時滿面驚慌。

無綫特製1：1人形攬枕，子華（右）笑言要帶「子珊」回家。

子善（左起）、祥仔和子華合三人之力才能抬起小寶！

高海寧大騷小蠻腰和長腿，扮o靚模晒V影相。

黃子華、徐子珊、高海寧和陳敏之等昨日宣傳劇集《My盛Lady》，「瘦蜢蜢」的子華在台上應要求抱起子珊時，子珊一臉驚慌，更疑似走光！其後子華被要求與林子善和阮兆祥一齊抱起陳嘉佳（小寶），他Man爆地說：「我一個人都得啦！」但得悉抱完後要照顧小寶一生一世，他即淆底推給子善：「你抱完就攞硬飛躍新人獎！」子善聞言即說：「又嚟？上次話拎最佳新人時已經飲咗洗腳水喇喎！」另外，小寶擺出「趷籮」甫士為「盛女選舉」拉票，慘被阿Bob取笑：「直頭係一張靈照！」

另外，無綫為他們製作1：1大小的人形攬枕送給觀眾，問到子珊會否擔心粉絲對她的攬枕有另類幻想時，她說：「成件事好驚，好驚見到自己有個1：1嘅產品出現，唔敢想像！」在旁的子華笑言想將子珊的攬枕帶回家：「放喺屋企露台，等有周刊嚟影時就舉起！（製造緋聞宣傳劇集？）唔會啦！我追咗子珊2個月都唔成功！」至於以性感o靚模打扮騷纖腰的高海寧，則希望投得自己的攬枕，又表示不怕Fans對攬枕有另類幻想：「我會叫自己唔好亂諗嘢！」

對收視有信心

提到劇集今日首播，子華表示心情興奮，對於子珊日前表示若收視有40點便叫他「跪回家」，他笑說：「我就着今日件魚生衫跪喺子珊揸嘅Van仔度，等佢送我返屋企。（有信心40點？）冇乜信心，不過絕對有信心維持依家嘅點數！（無綫靠你打仗！）靠擺我上枱就真，都係靠子珊穩陣啲！我冇乜依靠，呢次證明如果唔得，以後就可以慳番！」