在台上又唱又跳的草蜢成員蘇志威，台下卻是3間跳舞學校及2間男士禮服店的「揸弗人」。人稱「蘇老闆」的他近年生意愈做愈大，但他仍堅持生意只是副業，藝人才是正職，更不會強求兩名女兒繼承衣鉢，皆因女大女世界。

蘇志威的禮服店早前開張，獲好兄弟蔡一智（左）及蔡一傑撐場。

蘇志威堅持做生意只是副業，做藝人才是正職。

蘇志威與太太劉小慧豪花六位數字，為禮服店在巴士車身賣廣告。

蘇志威近日豪花六位數字，為其禮服店在巴士車身賣廣告，他更親自上陣擔任模特兒，做人肉生招牌吸引顧客。向來身形Fit爆的他表示充滿信心：「自問着西裝見得人，所以今次自己着番，同埋有一直Keep住身形去試着新衫。（用自己做生招牌？）依家好多人買禮服都話去蘇老闆嗰間，我依家都算係生招牌。」提到搞禮服生意，他坦言是由於貪靚：「呢個行頭少人做男士禮服，因為佢哋覺得唔起眼，我冇計過市場有幾大，淨係想設計啲靚嘅嘢出來，將上台表演嘅元素放落啲衫度。」

隨着服裝王國愈做愈大，問到會否由藝人轉行做全職生意人？蘇老闆向歌迷大派定心丸說：「我係藝人多於生意人，一定係草蜢行先，生意只係副業，而且做生意唔使用太多時間，因為我請到一班好團隊，有咩就交畀佢哋！」他又指現正忙於製作草蜢的新碟，除了有拿手的快歌外，還會唱類似《失樂園》的慢歌。

唔勉強囡囡繼承衣鉢

為事業打拚的蘇老闆雖然貴人事忙，但家人卻從沒埋怨，他說：「老婆跟我一齊去做嘢，佢都係藝人，明白我要工作陪唔到佢。啲小朋友都知爸爸係藝人，喜慶節日淨係喺電視見到爸爸，佢哋知我周圍飛好忙，我試過走咗三日，返來先知我原來走咗。」問到會否培養兩名女兒做接班人，繼承他的生意王國，他笑說：「唔會要佢哋繼承衣鉢，佢哋想做咩就做咩，不過細女前幾日問：『我第日出來做嘢爸爸死咗未？我想來舖頭幫手做嘢得唔得？不過我唔掃地洗廁所。』我就叫佢畀心機讀書先。」