有份參演周秀娜主演新片的趙勁皓與Bro5成員喇英，與兩位馬來西亞演員童冰玉及林佩琦飾演奸角，4人鬥晒拍攝「戰績」，他們更大讚兩女身材惹火。

Chris拍攝時不慎打落牆，但愈戰愈勇，相當有毅力。

Emily在片中有穿泳衣打交的戲份，非常厲害。

喇英硬食Bra、King（右）捱到胰臟炎入廠，兩個都慘。

喇英被Nude Bra焗到窒息的一幕令人心寒。

趙勁皓（King）與同門的Bro5成員喇英早前接拍電影《爆3俏嬌娃》，更與兩位來自馬來西亞的有料之人童冰玉（Chris）及林佩琦（Emily）合作，於戲中演奸角。提到片中打戲連場，四位演員鬥晒「戰績」，Chris及Emily拍攝時搞到周身傷，Chris說︰「之前同Chrissie（周秀娜）拍打戲，最尾一場要打去牆度，我打咗落牆整損晒。」Emily則表示撞了落擂台，以致半邊側身都有瘀傷。

至於喇英則自言最慘，要拍攝被Nude Bra蓋面窒息的場面︰「個Nude Bra係DaDa（盧頌之）就咁喺上身拎出來，都幾新鮮，拍攝前導演問我驚唔驚Nude Bra，我就答佢好鍾意。」他更因Nude Bra笠頭看不到路，行路時撞到。而King拍攝前因催谷肌肉過度，以致胰臟炎入醫院。

搣黐膠紙周身甩皮

問到跟兩位美女合作是否艷福無邊？喇英說︰「Emily着泳衣打交，真係好性感，心情好激盪。」至於King則大讚Chris及Emily的身材︰「馬來西亞啲人營養係咪好啲？」而Emily穿泳衣拍打戲可謂有苦自己知，她說︰「因為打嗰時防走光，要貼好多膠紙，但搣到周身甩皮。」