樂壇天后容祖兒的紅館跨年演唱會「添食」冇停口，為答謝樂迷，她在演唱會海報出盡「撒手鐧」：迷人電眼、噴血低胸、誘惑長腿，極盡性感！祖兒本想着肉色單車褲打底，但被攝影師當場Say No！

第7次在紅館開個唱的Joey打破紀錄連開15場，更希望將新元素帶給歌迷。

上一次紅館騷，Joey給自己太大壓力以致喪嘔。

為答謝歌迷，Joey大騷性感本錢拍海報，留下最美倩影。

Joey自爆每次開騷都會緊張，希望激發最佳表現。

Joey為免媽咪（右）擔心，答應她今次會錫身，盡情享受。

經過加場、加場再加場後，容祖兒（Joey）將於下月21至28、31日及明年1月1至6日，舉行一連15場《ageas富通保險1314容祖兒演唱會》，跨越2013唱到2014，更打破上次12場的紀錄！但未上台大晒唱功之前，Joey在拍攝演唱會海報時先「大晒冷」，以誘人緊身喱士露「峰」芒，更大騷白滑長腿，但她坦言拍攝之初感到尷尬，穿了肉色單車褲打底，但被攝影師吩咐除下，她笑說：「好少會着到咁，泳衣都好少會少布到咁。」但Joey預告演唱會上會有更性感的突破：「演唱會係會性感啲，但我希望大家唔係淨係記得性感，希望其他造型都會記得。」

壓力大曾喪嘔

今次已是Joey第7次在紅館舉行演唱會，但上次紅館開騷，Joey自爆落台後「喪嘔」黃膽水，她憶述當時給自己太大壓力，Rundown每兩首歌就換一套衫，彷彿挑戰人體極限，她謂今次要盡情享受表演：「記得媽咪上次睇完都話見到我好努力，但又戥我辛苦，對腳瘀到不似人形，媽咪唔係叫我唔畀心機做，但係要我喺舞台上舒服享受，唔好搞到好似打擂台咁。」

Joey自言每次開騷都希望為歌迷帶來新元素，但現在明白就算「錫身」一樣可以做到精彩演出，亦不代表「揸流攤」，舞台經驗豐富的她每次上台前仍會緊張：「唔緊張會冇咗份激素，發揮唔到小宇宙，但所謂緊張係講緊有充足準備下嘅緊張，咁件事會事半功倍。」

操弗Keep住潤澤

她笑言很多藝人，包括她都是「自虐狂」，每次開騷前都忍口，但完騷後又擦餐勁，已是不變「循環」，她又透露現已加緊操Fit：「開始操緊，但唔係要操到一舊舊乾晒好似張家輝咁，女仔要有啲潤澤。」不過她覺得為了演出，再辛苦都值得。另外，英皇珠寶宣布，凡購買珠寶鑲嵌類首飾滿港幣三萬元，即可獲贈祖兒演唱會門票兩張。