國際影星章子怡早前獲內地搖滾歌手汪峰在八萬名歌迷前發表八分鐘愛的宣言，令她冧爆落淚，戀情正式浮面，她其後在微博轉發男友新歌及以「My Music King」力撐愛郎，雖然至今仍未開腔回應戀情，但她昨日出席活動時全程甜笑，難掩興奮！

嘉玲表示待基金發展更穩定時，會考慮開設老人院或教育中心。

同樣有愛情滋潤的周麗淇索爆現身，成功吸睛。

身穿紅色裙的章子怡不時微笑，風騷又貴氣！

章子怡日前被男友汪峰八分鐘愛的宣言感動落淚成全城熱話，亦有傳她早前曾亮相前緋聞男友、內地名嘴撒貝寧的節目，當時兩人仍屬戀人關係，但隨着兩人分手，該段錄影播出時有可能被刪掉。子怡昨晚與劉嘉玲、台模林志玲、周麗淇及中國名模杜鵑等在上海出席Valentino旗艦店開幕派對，雖然子怡未有接受訪問回應與汪峰的戀情及有關報道，但仍難掩沐浴於愛河的甜蜜及喜悅。她在紅裙的映襯下更覺紅粉緋緋，甫到場即企定定任影，影足30秒兼全程面露甜笑。

睇好偉仔封影帝

至於嘉玲透露品牌特別支持她與丈夫梁朝偉所創立的TLC互愛基金，把品牌上海系列部分收益撥捐他們的基金作慈善用途：「基金喺我哋結婚嗰時成立，服務對象係老人家同小朋友。TLC係Tender Love and Care，你哋係咪以為Tony Love Carina。」她指基金一直在運作，只是沒有籌辦大型活動，問到基金有否籌款目標金額，她說：「咁好大壓力，一定要有好多錢先似樣。（會唔會好似嫣然天使基金咁搞籌款晚宴？）有需要會搞。（有冇同偉仔私下做探訪？）有。」

問到會否考慮過身後捐獻身家回饋社會？嘉玲說：「未諗到咁遠，但都要開始諗，我仲有家人。依家擁有嘅嘢都係來自社會，社會上都有好多唔同階層嘅人士需要幫助。（捐晒全副身家？）可以，我帶唔走，處理咗我啲家人後，其他就可以捐。（有十億八億？）我係天價，超過十億八億。（同偉仔有相同意向？）要同佢商量，但佢係一個好慷慨嘅人。」她坦言看好子怡憑電影《一代宗師》奪金馬獎最佳女主角，並大讚她演得好。記者指偉仔亦演得好時，她笑說：「梁朝偉，一定攞！（想佢哋一Pair咁攞獎？）有乜所謂，好就係好。但其實候選嘅全部，好似舒淇都係我朋友，佢哋邊個攞我都開心！」

另外，嘉玲於昨晚播出的《最佳女主角》內重提當年裸照事件，透露事發後朝偉曾擔心她會從18樓跳下輕生，因而不時找其朋友輪流陪伴她。