藝人林峯昨日出席聖誕活動，吸引近百粉絲圍觀，他即場大唱情歌兼走到粉絲群握手冧粉絲，並在台上與粉絲玩遊戲，還餵勝出的粉絲食棉花糖。林峯自言很愛吃棉花糖，亦愛烹飪，問到可有親自下廚給女友吳千語品嘗？他說：「最好唔好啦！因為煮得唔好食，但我會嘗試鍛煉。（千語話唔識煮嘢食？）我覺得佢應該係天才，因為佢嗅覺同味覺都好，佢都有整過嘢畀我食，係煮海鮮湯，唔係咁容易，基本上有咩材料喺度佢就整到，佢少煮但煮親都冇乜閃失。」記者笑指千語娶得過，他笑着沒回答，只說：「男仔都要識煮嘢食，謝天華都煮得好叻，自己要惡補！（炮製聖誕大餐？）肯試就得o架喇！不過我聖誕都有啲工作傾緊！」

林峯炮製棉花糖，親手餵女Fans品嘗。