「機會是留給有準備的人」，入行多年的郭穎兒（Celia K.）嘗盡甜酸苦辣，今年終於捱出頭，雖然有傳其同門師姐陳靜（DaDa）即將復出，但Celia K.不會視為對手，反而希望與DaDa並肩作戰！

Celia K.入行後嘗盡酸甜苦辣，現在總算苦盡甘來。

Celia K.（右）早前與蕭美卡到釜山出席《第18屆釜山國際電影節》。

曾是o靚「模」的Celia K.，憑着三點式寫真集成名。

Celia K.首次參演電影即擔正做女主角，更有大膽床戲。

Celia K.（左二）亦有份參演電影《喜愛夜蒲3》，與伍詠薇（中）等前輩合作。

Celia K.（右）視DaDa為戰友，二人常常一起出席活動。

兩年前獲施念慈（Celia）賞識並羅致旗下的郭穎兒，由o靚「模」起家，在書展推出三點式寫真集成名，去年她嘗試做演員，接拍三級片《一路向西》，雖然角色離不開「脫」，但首部戲便擔正做女主角。最近她又接拍電影《喜愛夜蒲3》，在片中有大膽演出。儘管Ceila K.拍過電影、做過o靚「模」，但她並不覺得自己「紅」，反而一臉誠懇地說：「我都好想似鄭俊弘咁，出到街畀人叫得出個名！」

風光背後的辛酸

大多數藝人的風光背後，都有一大籮辛酸史，年僅25歲的Celia K.在未簽經理人公司前，已在圈中不斷尋求機會，她說：「我做過Dancers，又試過做所謂嘅特約演員，其實咪即係茄喱啡，之後簽咗做一間公司做模特兒，但啲客多數鍾意氣質型嘅Model，我好少畀人揀中，惟有一邊做Model，一邊做化妝師幫補生計。又試過問朋友借衫着、借屋住，仲要將啲儲蓄、保險同基金賣晒！好多人都問我點解唔放棄，係因為我唔信個天會唔眷顧我，都努力咗咁多年，想證明畀自己睇，條路係冇揀錯，只不過機會未到。」

就在她感到絕望的時候，上天讓她遇上新機會。她明知加入Celia的公司要行性感路線，但她仍不放過這個機會：「我一直都唔係行性感路線，但嗰時興性感o靚『模』，我即刻覺得係個機會！」Celia K.便懷着勇氣當上寫真女模，更半裸演出《一路向西》。回想拍攝第一日就要與對手上床，真是既尷尬又難堪，她說：「我唔識個男主角，點都估唔到第一日就要拍，真係尷尬到不得了，淨係戴住Nude Bra同佢做動作，真係低估咗嗰種感覺，好難受！但嗰刻都要頂硬上，只係想拿拿聲搞掂佢，拍完咪入廁所喊囉！」

視DaDa為學習對象

Celia K.珍惜每個工作機會，早前她更有幸出席《第18屆釜山國際電影節》，雖然有指這個機會本屬師姐DaDa，她說：「其實我同佢係好朋友，我從來冇諗過同佢爭，加上我未入公司，佢已經紅咗，所以我唔會視佢為對手，而係學習對象！老實講佢『閃退』對我事業冇任何幫助，反而係冇咗個戰友，希望佢快啲出番嚟，因為呢個影圈女演員已經好少喇！」

後記：成功轉型拍戲

還記得數年前，圈中藝人見到o靚「模」都避之則吉，即使再難聽的說話都聽過，但慶幸她們十分爭氣，不少o靚「模」更成功轉型拍戲，出鏡率不比「正常」演員少。雖然Celia K.的戲齡幼嫩，但肯搏肯捱的工作態度，輕易成為兩部電影女主角，比起當年做茄喱啡，總算有個交代。