十八位亞洲先生昨日比併才藝，卻變成騎呢Hea爆大雜燴，大部分參賽者均準備不足(6)劉梓豪演戲時求其擺出驚訝表情，(9)趙之健唱歌甩嘴甩到要尷尬道歉，(14)余健深講完笑話反問點解冇人笑，令人O嘴！

(6)劉梓豪擺出浮誇驚訝表情後突然仆低，其實想點呢？

爛Gag王(14)余健深自知講笑話失敗，即做一字馬補救。

好彩(3)黃威又半裸騷肌，都叫有啲睇頭！

(2)喬冠文着古裝吹笛，都算有誠意嘅。

應屆十八位亞洲先生昨日在亞視總台鬥才藝，精彩欠奉Hea爆有之，大部分參賽者準備不足，廣州代表(9)趙之健最離譜，唱歌忘記近三分一歌詞，尷尬得說了三次Sorry，馬來西亞代表(14)余健深表演講笑話：「兩隻餃子洞房，剝衫後男餃子唔認得對方，女餃子就話『好衰o架！人哋冇着衫就唔認得人。』」講完後全場寂靜，他無奈地說：「講完喇！你哋做咩唔笑？可唔可以畀啲掌聲我？」其後做一字馬博加分。

來自北京的(6)劉梓豪演戲時求其擺出愕然表情，之後撻落地，用意不明；江蘇代表(7)王鍾「光速」耍少林拳，出拳未夠十下便收工，韓男(11)崔宰源在屏風後「表演」快速換衫，但要人呆等，不見得換衫速度有多快！面對如此「精彩」演出，評判羅霖認為亞生應加強自信。

六人入三甲

本地薑(17)李大衞歌藝不俗又懂擦亞視鞋，最後成功奪冠，亞軍是來自日本、表演空手道的(18)大塚寬之，季軍竟有四位得獎者，分別是(4)鍾昊、(10)王磊、(12)李健及(13)楊志仁。李大衞不認為自己贏出是爆冷：「我喜歡唱歌，是歌唱老師戴思聰的學生，班上同學都讚我靚仔，幫我投票。」至於崔宰源贏得由參賽者互選的「最友好兄弟」獎，但不懂中文的他擺烏龍以為得才藝獎。