o靚模羅子喬早前初登大銀幕後便愛上拍戲，擁有逼爆身材的她不介意「雙峰」成為賣點，更懶理公司內模特兒大執位，坦言恨上位爭取更多機會！

Bella對演技頗有信心，希望日後向演藝方面發展。

身材惹火的Bella不介意騷身材，認為有好嘢唔怕露！

羅子喬（Bella）與師姐「爆E超蓮」鍾采羲（Iris）同樣擁有逼爆身材，早前更初嘗拍戲的滋味，拍住師姐Iris齊齊逼爆大銀幕！雖然Bella拍戲經驗尚淺，但她自言拍攝時一Take過，獲得工作人員稱讚，為其演技打了強心針，故她表示要繼續走演藝之路︰「拍戲好開心，當你唔使成日NG，就會更加有信心！我鍾意演戲，希望日後有更多發揮！」提到近日其公司內的模特兒大執位，Bella坦言想上位，但不擔心出現惡性競爭︰「邊個唔想，係人都想做好啲o架啦！不過我相信公司對每位模特兒都有計劃，做呢行個個都剝過，但大家路線唔同！」

新人受氣不介懷

作為新人的Bella認為現在要做好自己，懶理是非，問到作為新人是否經常畀人蝦？她說︰「我出去都係嘻嘻哈哈，笑晒口，好難得罪人，而且個個都好照顧我，咁當然，因為係新人，人哋態度會差啲！」雖然試過出外工作受氣，但Bella以平常心面對，完全不當一回事，她說︰「好正常，好多新人都經歷過，我都預咗，當時一開始會有少少唔開心，但之後都慣咗！呢個社會係咁，最緊要做人開心就得！」