吳啟華回巢無綫拍劇，與港姐出身的朱千雪飾演情侶，他大讚對方有潛質，又自爆最懷念的舊拍檔是蔡少芬，希望與她再合作幕前演出。

回巢的啟華坦言恨攞視帝，不過還是以平常心看待。

朱千雪於處女劇中飾演醫生，備受啟華讚賞。

啟華希望跟多次合作的蔡少芬再擦出火花。

「愛妻號」啟華拒做工作狂，就是為抽空陪老婆及女兒。

吳啟華重返無綫拍攝新劇《On Call 36小時II》，未知是否為提高收視，對於視帝獎座，他則直言恨攞獎：「最重要嗰個獎未拎過，一係就唔做，做得演員就想拎，但控制唔到，有時發吓夢諗吓上台領獎會講咩。」劇中他與前港姐朱千雪飾演一對，對於朱千雪，他大讚：「佢好聰明，又唔怯場，以前我做新人驚到連對白都講唔到，今次佢好少NG，反而我次數多過佢。但佢可能人生經驗未夠豐富，佢好似冇拍過拖、冇失戀過，幸福滿瀉嘅人生經歷唔多，有啲嘢要靠自己，呢啲冇得幫。」

問到最希望再與哪位舊拍檔合作？他不假思索即表示是蔡少芬：「佢叫做合作得最多，好想再同佢合作。」曾在無綫拍過多部經典劇集，問到重返無綫拍劇有何感覺？吳啟華坦言感覺比以前好：「以前嗰個冇認識過，高高在上咁，飯都冇食過。依家好好多，有乜我都會同佢（無綫老闆陳國強）講，將公司真實一面話佢知。」

搵人仔改善生活

他坦言已安排一年拍約三部劇集，主要內地兩部、香港一部，希望有更多時間陪太太和女兒。他自爆過往在無綫收入不多，離開無綫才真正「脫貧」：「我十幾歲出道已經好窮，離開無綫先叫好少少，內地真係可以叫有好少少嘅酬勞。以前窮到屋租都交唔到，試過三千蚊一個月，同湯鎮業打麻雀輸咗我千幾蚊，真係擔心冇錢生活。」