周秀娜與同門師妹余曉彤（Hidy）及盧頌之（DaDa Lo）因拍打戲練得一身好功夫，笑言若開拍續集會拖導演卓韻芝落水演出，並齊齊圍攻對方。愛上打拳的娜姐又希望開設以拳館作主題的Cafe，擴展其吸金王國。

娜姐笑言要夾埋Hidy及DaDa，諗計打卓韻芝。

娜姐的腿功與Hidy睇嚟差唔多！

娜姐與冠軍級教練Brian練拳，有板有眼。

Hidy

近年殺入影圈做打女的周秀娜早前率領兩位同門師妹余曉彤及盧頌之再戰大銀幕，齊齊在卓韻芝執導的新片《爆3俏嬌娃》中拳來拳往，挑戰有份演出的冠軍級教練Brian，眾女拍攝後已練得一身好功夫，睇得又打得。提到戲中齊齊出招打Brian，眾女直言相當痛快，DaDa Lo說︰「有一幕係我哋三個決戰Brian，當然冇留手啦！佢係拳王會頂得住。」問到會否搵個打得男友保護自己？Hidy說︰「我就唔使，我覺得消防員都OK。」言語間暗示其消防員男友已夠煞食。

讚Hidy腿功驚人

娜姐直言Hidy在眾女中最好打，大讚腿功驚人︰「雖然戲中冇畀Hidy打，但佢好勁，腿功驚人，而DaDa Lo就食力驚人。」她表示在片場中搭出來的拳館用真實道具，又有擂台，感覺如擁有一間拳館，拍畢電影後直言不捨得。問投資有道的她有否打算開拳館？她直言想開設拳館為主題的Cafe︰「我想開一間Cafe，裏面係以拳館為主題，方便練『水魚線』嘅人嚟食嘢，到時有咁多大隻仔嚟，會好壯觀。」

至於導演阿芝透露有意開拍續集，但現時忙於籌備年底的Talk騷《床上哈哈笑》，故稍後再作打算。眾女聞言後相當興奮，娜姐笑言若拍續集，會叫阿芝落場演出，讓眾人打番夠本，她說︰「如果拍續集，大家會決定打阿芝，因為打導演喺片場比較少見。」