兩大影帝梁家輝及張家輝前晚於時裝活動碰頭，對於有份提名今屆《金馬獎》最佳男主角，他倆都謙稱得獎與否都感到榮幸。梁家輝更笑言有兩個家輝已經贏晒！

梁家輝及張家輝一同出席時裝活動，互相「輝」映！

「雙輝」梁家輝（左）及張家輝難得同台，零舍好傾。

陳智燊澄清與朱千雪只是好朋友。

兩大影帝梁家輝與張家輝前晚一同出席時裝活動，星光熠熠。早前傷了肋骨的梁家輝表示已經康復，問到是否已「斷尾」，他笑說：「可能哮喘或便秘會有影響，人到中年，病會影響心情，因為預計今年做嘅嘢要推到下年，可能會有抑鬱！」他又表示現在可以復工，但不能追趕跑跳如此搏命：「唔可以當自己係譚詠麟年年25歲！（減少動作戲？）我點都會盡做，但要識得保護自己。」而有份提名今屆《金馬獎》最佳男主角的他，認為今年有三個香港代表入圍，覺得已經贏了，他說：「就算攞唔到獎都好威水！（張家輝話睇好你？）唔好講睇唔睇好，我覺得有兩個Tony Leung（自己和梁朝偉）同兩個家輝已經贏晒！」

至於同樣提名最佳男主角的張家輝坦言感到榮幸，特別是今年《金馬獎》50周年。對於與梁家輝同場及「雙家輝」再現《金馬獎》，他說：「我冇乜諗獎項，同台都有好多影后、影帝，呢啲盛況50年難得一見。（有冇同梁家輝分享賽前感受？）我同佢講『最驚係你』，我會當一個Party咁參加。（打定輸數？）冇乜點諗，又唔係隻揪！」

陳智燊否認劈腿

而同場的藝人陳智燊對於曾與他傳緋聞的馬賽被拍得與女性製作人密遊兼咀嘴，他表示未看過該片段，不方便回應對方的私生活。有傳他一腳踏兩船，並與宋熙年及朱千雪傳緋聞，他立即澄清：「好無奈，我同朱千雪係好朋友。（報道指佢係姣星？）唔係，佢係好女仔，呢件事唔會影響彼此嘅關係，希望大家唔好相信！」