佘穎焗翹手冧客
無綫昨晚舉行節目巡禮大晒冷，造就新歡舊愛齊相聚，當中鄭嘉穎與兩「前度」周麗淇及佘詩曼尷尬相逢，零交流各自搵「擋箭牌」，但為吸客，嘉穎焗翹阿佘。而一班二線女星呂慧儀、高海寧及朱晨麗等「暴乳」出巡，當中「鬧小三」的人妻呂慧儀發惡，「胸」贏全場花旦！
鄭嘉穎與佘詩曼舊愛再相逢，還翹實拉客未感尷尬！
呂慧儀中門大開兼搽深色指甲油，擺明向「小三」示威！
無綫差不多總動員出席節目巡禮，「星」勢浩大。
嘉穎企阿佘身邊，與另一舊愛周麗淇相隔數身位。
黃心穎應大會主題，性感上陣「鬥波」！
高海寧身穿低胸裙晒料，不愧為「無綫咪神」。
朱晨麗夾出4吋事業線，「事業」心勁重！
胡杏兒心口開一刀，當家花旦中算最性感。
無綫動員近200藝人舉行《無綫節目巡禮2014》，趁勢實力大晒冷Mark實廣告客戶！公司「吹雞」下，不少新歡舊愛再相聚，昔日「舊愛三人組」嘉穎、阿佘及周麗淇（Niki）罕有聚頭，為Niki爆出「姊弟戀」後首次再遇舊愛。嘉穎與阿佘大合照時企埋一齊但零交流，嘉穎更「擰歪面」與鍾嘉欣閒聊，阿佘則黐實陳豪唔放，而相隔4個身位的Niki亦與黃宗澤咬耳仔，各搵擋箭牌扮「睇你唔到」。嘉穎行紅地氈時一展男士風度，輕扶腳踏高踭鞋的阿佘。
「夾口供」私下有偈傾
訪問時，嘉穎表示兩舊愛同場未有尷尬：「冇尷尬，之前都一齊做過嘢。（同阿佘零交流？）有同佢傾過偈，你見唔到啫！（遲啲同Niki合作？）公司叫我做嘅嘢都會做。」阿佘被問到再翹嘉穎有何感覺，她說：「我同佢（嘉穎）有傾偈。（尷尬？）點解呀？冇嘢，做嘢啫！（有冇同Niki傾偈？）好多同事傾，唔記得有冇。」還透露暫與嘉穎未有合作。另一主角Niki亦自言與嘉穎有打招呼，對於有指簽無綫，她說：「會但唔係換獎。（同嘉穎合作？）冇收到消息，邊有得揀人，都係做嘢啫！（如果再做情侶？）唔介意合作，睇吓做啲咩啦！（加埋阿佘？）吓！咁得意。」
當家花旦全部打扮密實，只有胡杏兒心口猶如「開了一刀」若隱若現，相反其他等上位的二線女藝員勁晒本錢搶盡廣告客戶焦點，為來年錢途鋪路！當中人妻呂慧儀中門大開騷雙半球，性感冠絕全場，她昨晚還搽上深色指甲油，但強調非向「小三」示威：「係深紫色，屋企冇黑色指甲油，黑色好似中毒咁！（同老公咩關係？）兩公婆互相信任！冇事！結婚戒指戴得好穩！」而「咪神」高海寧繼續「乳」出驚人，低胸Tube Dress紮到行，前港姐冠軍朱晨麗亦夾出4吋事業線，大有睇頭，問到是否「事業」心重？她說：「女仔事業心要重啲，所以我都要加重啲！」
由於奪得來年巴西舉行的世界杯播映權，無綫昨晚重點宣傳大玩森巴魅力，並由許亦妮、港姐陳凱琳及蔡思貝等力Sell。嘉穎及子珊打頭陣「拉客」落足嘴頭，力氹廣告客戶落廣告，並有逾60藝人由四方湧出，製造人強馬壯氣勢之餘，與廣告客戶零距離接觸。
