回流香港的鍾麗緹，前日下午以一身名牌裝扮，出動到銅鑼灣幫襯平民街邊檔，爽快地以約1,300元買下數條「朱義盛」頸鏈，拿着戰利品滿足地離開。

為咗現身時Sharp醒過人，鍾麗緹梗要預備定靚靚首飾襯衫啦！

鍾麗緹仔細挑選街邊檔擺賣的「朱義盛」，揀啱即畀錢。

現年43歲的鍾麗緹經歷過兩段失敗婚姻，獨力照顧3名女兒的她，近日由北京回流香港發展，積極賺錢養家，前日下午4時半，鍾麗緹獨自出動往銅鑼灣行街，雖以素顏示人，但戴Cap帽兼全身包到冚的她依然美艷不減。

對鏡左襯右襯

孭住名牌袋的鍾麗緹棄攻名店，反而對街邊檔更感興趣，只見她埋首於檔口忘我地揀「朱義盛」飾物，邊揀邊與老闆娘傾唔停，懶理路邊人來人往，不時露出燦爛的笑容。

鍾麗緹對款式誇張的大頸鏈情有獨鍾，逐一往身上拼來拼去，對住塊小鏡子照個不停，未幾揀中心頭好，埋單盛惠約1,300元，她未有和老闆娘討價還價，爽快地取出名牌銀包付款，看來只要揀啱心頭好，她絲毫不介意價錢。

及至發現記者拍照，鍾麗緹依然笑晒口任影唔嬲，並好奇地問：「點解你哋認到我嘅？（你咁靚女！）但我冇化妝喎！」記者指她素顏一樣漂亮，鍾麗緹即被氹到笑不停，然後禮貌地揮手離開。