軟硬將於農曆新年在紅館合體開騷，兩人張揚會表演「肌肉夾利是」的絕技，怕孤獨的林海峰（Jan）將獲逾萬名觀眾陪他在紅館過生日。另外，Jan又否認阻止大女拍拖，自爆連家中工人都多人追。

正密鑼緊鼓籌備賀歲騷的軟硬，將與逾萬名粉絲過農曆年。

愛玩嘢的軟硬於現場找人扮他們的老中青Look，相當搞笑！

阿葛（左）於記者會上不時抹汗，好緊張咁喎！

軟硬昨日為明年1月23至26及28至30日、在紅館舉行的賀歲騷《麥當勞麥麥嘻麥麥哈軟硬嘻哈OPERA 2014》舉行記者會，頭戴膠假髮的他們抵死地說:「今次糅合咗現代芭蕾舞團加本土電視劇嘅精神，我哋會用現代褲打底，加雞汁共冶一爐！」葛民輝（阿葛）說：「我會練定肌肉表演『夾利是』，但到時觀眾冇帶利是唔緊要，千祈唔好帶錯帛金就得喇！」

明年1月28日46歲牛一的Jan，被問到為何仍願意接騷？他笑說：「打發吓時間啫，驚冇人同我慶祝，屋企人都未約我。」阿葛在旁醒目地說：「我哋都未試過喺紅館搞生日會，我會將我啲朱古力（腹肌）練成一個Cake，畀好兄弟生日嗰晚切o架喇！」

預咗超時罰錢

對於早前有報道指禁止大女林泳拍拖，Jan說：「冇咁嘅事！我係嗌啲人唔好『追佢』攞飛啫，因為一開騷就有好多人問我哋攞飛，連屋企個工人都畀人『追』呀！所以大家要飛就唔好再追我個女喇，直接搵我啦！（嗰啲人係咪追你個女唔係追飛呀？）唔排除有咁嘅可能，但係個別事件。」而對於新修訂的《商品說明條例》要求準時開騷，他們指冇有怕：「每個人對準時開場定義唔同嘅，我哋唔係計時間，係用年份計，今年開咗下年又開咪準時囉！（怕唔怕超時罰錢？）預咗啦，不嬲都罰嘅。」