現年69歲的白韻琹昨晚接受nowTV《娛樂審死官》訪問，大談跟54歲老公謝偉俊有愛冇性！愛將家事外揚的白韻琹自爆謝偉俊曾動手打她，不過她都有還手，而且打得大力過對方！她還細說自己很委屈，廿幾年冇人錫冇人攬：「我同佢唔算夫妻，廿幾年冇行房，我都嬲自己呢廿幾年冇，不過係自己選擇，如果重新選擇會揀第二個，唔會揀佢！（點解唔離婚？）好多原因，拖吓拖吓就算，但唔代表我以後都唔會離，有需要嘅話會即刻離！（唔離婚係咪因為財政問題？）好多夫妻因財失義，我唔想變成咁！（咁你廿幾個物業係咪你名下？）我冇理，交晒畀謝偉俊律師行理，不過，最近我買嘅兩個物業就用我名。」

白韻琹大談與謝偉俊有愛冇性的夫妻生活及委屈。

謝偉俊

白韻琹之前曾在巴士意外中受傷，其後在社交網站留言指身傷不及心傷。對此，白韻琹指當時謝偉俊沒有問候過她，但有接她出院。節目主持梁思浩問白韻琹有很多名車，為何要坐巴士，是否謝偉俊不讓她坐？白韻琹說：「唔係！只係我自己想阿Paul（謝偉俊）坐得舒服啲。（之前有指你上唔到謝偉俊嘅辦公室？）係啲讒臣弄權，佢唔知嘅。（佢咪好似昏君？）我成日都係咁叫佢，但佢喺立法會就係明君。」

梁思浩爆白韻琹在錄影節目前，曾捉着他的手哭訴廿年感情付諸流水，又稱1989年時，白韻琹曾跟司馬燕及寇鴻萍食飯，她曾拿着謝偉俊的全裸照，收一千蚊就讓朋友看，而一位電影界女強人都有「幫襯」。而原定昨晚的節目題目是講曾志偉，亦因白韻琹自爆感情問題，而將主題改了「感情路上能醫不自醫」。

另一邊廂，謝偉俊前晚出席CASH頒獎禮，被追問白韻琹在FB的「控訴」，他稱沒有與她鬧交及不知FB留言一事。談到兩人感情，他略有猶豫地說：「都OK嘅我諗！（激嬲咗佢？）唯一我諗係太忙冇乜陪佢。」並稱現時兩人仍同住，問到多久沒有交談？他即語塞，之後才說：「有時係無聲勝有聲！」他稱與白韻琹關係是伴侶及配偶，暫時未有任何變化，亦沒有第三者。