陳庭欣（Toby）豪擲6位數投資的日式餐廳昨日開業，她帶同爸爸和壽星媽咪到場慶祝，而緋聞男友翟威廉亦不避嫌到賀，順道見家長！他又頻頻提點「女友」，似足其「背後男人」！Toby又透露威廉的哥哥做日本食品批發，相信能免費攞貨，果然一家親！

Toby發言前都要拉實「男友」威廉，唔通真係咁癡纏？

威廉主動同賓客敬酒，似足「男主人」！

Toby（左）帶同父母到場，更向媽咪獻吻賀生日！

陳煒（右）到場支持Toby，卻大頭蝦冇帶禮物！

前港姐陳庭欣有份投資的日式餐廳昨日開張，一眾圈中好友包括黃百鳴、陳煒、莊思敏和莊思明等到場支持，其緋聞男友翟威廉更現身力撐「女友」，二人合照時更被笑似擺喜酒！昨日適逢Toby媽咪生日，這名孝順女更準備了花束和蛋糕為媽咪慶祝！

榮升老闆娘的Toby表示投資了6位數，但開舖共需7位數：「係同4個朋友夾嘅！（幾時回本？）計過條數，希望1年內。（男友嚟支持你！）所有朋友都有嚟！」威廉特地在日本買了一支金箔清酒作賀禮，Toby將它放在門口當眼位置，可見「男友」地位超然！她又大讚威廉幫得手：「佢哥哥做日本食品批發，可以畀吓意見。（會唔會畀Discount你？）都會啩！（免費畀你？）同佢講聲應該OK嘅！」真係一家親！

陳煒人到禮未到

對於Toby將禮物珍而重之地收藏，威廉深感安慰：「位係其次，最緊要係好好哋做！」但他拒絕一齊做生意：「唔係好熟（做生意），唔好搞咁多啦！」似乎甘於做Toby的背後男人！威廉受訪時還不斷語重心長地教Toby做生意，不要玩玩吓，錫到出晒面！而陳煒則表示無意做生意，但大懵的她竟忘記買禮物，只能後補。