陳豪和鍾嘉欣昨日出席《Medlink一周年慶典》，獲物理治療師及中醫師教做健身操。快做爸爸的陳豪更得到醫師教產前操，其妻陳茵媺（Aimee）亦可受惠。

陳豪大讚老婆Aimee和未出世的囝囝腳頭好。

鍾嘉欣學健身操，又經常做運動，難怪體態Fit爆！

快將做爸爸的陳豪（阿Mo），連台上司儀都分享喜悅，叫其未出世的囝囝為「小Mo」、「Mo仔」，令已為囝囝改好名但又未能公開的阿Mo有點氣憤！事後再問他時，阿Mo說：「都話唔係呢啲名，已經改咗名喇！但唔講得住！（囝囝好似好腳頭令你搵好多錢喎！）媽咪同囝囝都好腳頭！（頭先見你眼紅紅，係咪好感動？）今年真係好感恩、好珍惜，嚟緊想畀多啲幸福老婆同囝囝，做個好老公同爸爸。（想追個女？）等囝囝出咗世，媽咪身體復原，先再算！我返去都會陪老婆練習產前操。（望拎埋視帝？）承你貴言啦！不過今年已經夠開心！」

同場的鍾嘉欣穿白色貼身裙，體態很弗，她表示平日不用開工的話，每天做半小時運動：「對身體好嘛！（唔叫伍允龍教你打功夫？）因為唔夠時間呀！自己去跑步就唔使人陪啦！（之前同陳展鵬嘅緋聞曝光喎！）其實早前已經喺微博澄清咗一次啦，當劇集宣傳囉，有人搵做螢幕情侶都幾好！」

嘉欣街坊做「天文台」

至於是否怕男友呷醋？她說：「唔會啦，但依家就真係多咗好多狗仔隊跟，自己喺呢方面真係冇乜警覺性，反而係啲街坊會提醒我囉！」