近日謝霆鋒為大仔Lucas的返學問題搞到頭都大埋，有指前妻張栢芝因沒帶兒子上學，令學校發出最後通牒。霆鋒昨日直認為兒子上學問題跟學校斡旋，更話中帶刺以「人哋」稱呼栢芝，又強調會搞掂事件！

嫲嫲過身加上兒子返學問題，難怪霆鋒心事重重！

霆鋒被問到粉絲希望他與王菲復合，他即微微嘴笑。

霆鋒與一眾演員到北京出席電影發布會，係威係勢。

在場消防員及粉絲爭相圍住霆鋒等合照。

早前有傳霆鋒兩個兒子跟隨栢芝移居加拿大時，他曾向公司請假，足見愛子心切！昨日他在北京出席英皇電影《救火英雄》發布會時，顯得心事重重，戴上黑超穿灰褸黑衫褲的他表現低調，未有參與遊戲。受訪時，被問到有指栢芝沒有帶大仔Lucas上學，與栢芝共同撫養兩子的他雖然未有正面回應，但承認正為兒子就學一事操心：「我非常緊密咁搞緊呢件事。（咩事？）返學。（加拿大定係香港學校？）香港。」其後他接受電視台訪問時被問到有傳栢芝沒有帶Lucas上學而令校方發最後通牒，他說：「呢啲我會搞，同佢（指學校）盡量配合。」問到是否栢芝不讓兒子上學，一直語調平靜的他語氣出現變化，更似割席般以「人哋」稱呼栢芝，並強調會搞掂兒子上學問題：「唔講人哋嘅嘢，自己盡量去搞。」話中有話！

否認栢芝阻奔喪

此外，霆鋒嫲嫲於本月16日在澳洲離世，問到有否影響心情？出名孝順嫲嫲的他坦言心情未能平復：「多多少少都有，但唔會畀自己影響劇組。」談到嫲嫲身後事及稍後會否往澳洲，他說：「要！成家已經跟時辰裝咗香，仲有啲儀式返到去依時辰再做多次，其他儀式都做晒。」問到嫲嫲離世時不在身邊有否遺憾？他表示面對親人離世要以正面態度對待：「年頭飛過去一次，嫲嫲都昏迷咗幾年，有次佢擘大眼望住我十幾二十分鐘，已經好奇迹，最重要係知佢唔難受。」問到會否帶兒子到澳洲，他表示再去才會想，並否認有傳栢芝不願讓兒子奔喪。

談到今次拍戲有爆破場面，有否做足安全措施，霆鋒表示有特別小心，並直認曾拉傷：「每日要孭住氧氣筒跑，我有哮喘，之後適應咗OK。」提到舊愛王菲離婚後，不少粉絲希望兩人復合，他笑說：「唔講喇呢啲！」完騷後，他被粉絲及在場消防員圍住爭相影相。