蔡少芬1,200萬豪宅 變囡囡「行宮」
藝人蔡少芬（Ada）與動作演員老公張晉，為了讓愛女不用山長水遠返學，豪擲1,200萬元買入凱旋門豪宅作女兒「行宮」，而Ada更趁機大晒幸福，笑指老公出錢送樓，令她成為豪宅主人！
蔡少芬與張晉對兩個寶貝女錫到燶，使千零萬濕濕碎啦！
蔡少芬榮升豪宅業主，笑到四萬咁口！
為方便楚兒返學，蔡少芬竟然要買屋！（資料圖片）
蔡少芬為搵「奶粉錢」，落力宣傳代言奶粉。
近日樓市氣氛轉冷，但圈中廿四孝父母張晉及蔡少芬，為了給兩位愛女添「行宮」，無懼「摸頂」斥資1,200萬元買入九龍站豪宅。根據土地註冊處資料，Ada上月以1,200萬元買入凱旋門一個實用面積約420方呎的中高層一房單位。
昨日Ada在金鐘以代言人身份出席奶粉活動時，大方坦承買豪宅一事，更大晒幸福笑言是老公出錢出主意！現居於元朗錦綉花園的她，被問到是否想搬出市區時，她即否認說：「唔係！我哋本身住元朗，始終郊外空氣都好啲，但為咗個女讀書，都諗住喺市區買番個單位。」
老公送樓晒幸福
現時Ada的大女楚兒約兩歲半，並在紅磡的英文幼稚園上學，而細女信兒則7個月大，但Ada已為兩女讀書着想，為了讓愛女上學時有地方「歇歇」而一擲1,200萬元！問到為何屬意凱旋門？她說：「平日都鍾意喺呢頭行街，都係老公揸Fit（主意），將來兩頭住，唔使車來車去，方便個女讀書。」
問到誰人出錢買樓？Ada趁機大晒幸福：「佢（老公）出主意，梗係佢畀錢！佢供啦！」對於業主只有她的名字時，她冧爆地笑到見牙唔見眼說：「哈哈！我哋講心唔講金o架！」雖然剛成為豪宅業主，但她坦言「奶粉錢」唔易賺，所以談到連續兩年任奶粉代言人，她即笑說：「有奶粉飲梗係好啦！」而她對愛女的生活習慣亦甚為着緊：「個女8點要上床瞓，嚟緊我希望拍多啲電影，時間短啲，有多啲時間湊女。」談到有線將推出整容真人騷，有血淋淋手術鏡頭，Ada大感興趣：「嘩！想快啲睇！趁個女仲細唔識睇，但佢返咗學都冇時間睇。」
