Melanie Z.瑜做愈索

混血女模Melanie Z.除了模特兒正職外，原來另有副業，就是瑜伽導師，學了瑜伽達十年的她持有導師牌，最近開始開班授徒。

由憎到愛

原來Melanie初次接觸瑜伽時並不喜歡，她說：「當年係因為媽咪想學瑜伽，叫我陪佢一齊學，我嘅骨頭好硬，個人彎腰向下，雙手最多只可以掂到膝頭，我覺得做瑜伽會痛，所以唔鍾意！」雖然心裏厭惡，但Melanie為健康着想，決定繼續上堂：「我讀高中嘅時候，身高179cm，但只有110磅，又瘦又弱，就算食好多嘢都肥唔到，因為唔吸收。不過做咗瑜伽冇耐，就睇到身體同之前嘅分別，個人變得好有Energy！我之前脊骨有啲歪，但做咗瑜伽令呢個問題有改善，亦冇再脊骨痛。我好快就愛上咗做瑜伽，依家每日都會做一小時瑜伽，唔做唔舒服！」

Melanie認為瑜伽適合任何年齡人士，不但可以強身健體，亦可以收靚身形，她說：「會令到成個身形好靚，個人仲會高咗，因為瑜伽會糾正你嘅姿勢，令你企得好直。你會覺得自己好有力量，但唔似做健身咁變到好大隻。」除了身體上的得着，還有精神上的裨益，她說：「當你做瑜伽嘅時候，你要全神貫注，只係專注自己嘅呼吸同動作，唔可以諗其他嘢。有時我哋以為自己冇壓力，其實只係一直承受住壓力而唔知，可能係習慣咗長期受壓，但當你做咗瑜伽之後，先會發現咩係放鬆，唔單止係身體上嘅放鬆，仲係精神上！」

做埋導師

雖然Melanie已學了瑜伽十年，但她從來不會感到厭倦，因為瑜伽是學無止境：「唔係你學咗一套動作就等於學完，從唔同導師身上可以學到唔同動作，身體係好複雜，你學得愈耐，愈發現自己嘅不足，就算我依家成為老師，都可以喺學生身上學到嘢，教學相長，因為瑜伽係關於Body Movement， 唔同人做同一套動作都會有唔同Movement。」她指瑜伽的動作很有彈性，沒有一定準則，她解釋：「唔同人嘅身體狀況唔同，所以應該量力而為，太勉強反而會整傷自己，只要你做嘅動作適合自己就得。」身為導師的她亦是要了解每位學生的身體狀況而因材施教。