甄子丹促趙文卓道歉

甄子丹前日與景甜、安志杰等到廣州宣傳電影《特殊身份》，去年拍攝《特》片期間，子丹與趙文卓鬧出交惡風波，當時《特》片宣布終止與趙文卓的合作關係，並指他耍大牌，而趙文卓則反指子丹是「戲霸」，後來更令聲援子丹的舒淇遭網友翻舊帳，引起軒然大波。子丹昨日說：「身為監製，一開始係我搵趙文卓，但公司唔想搵佢，覺得佢麻煩，最後我說服咗公司。後來佢要走，我親自去哀求同挽留佢，搵佢前經紀人商量點樣解決問題，冇諗過後來會發生咁多醜惡事，牽涉到圈中人、朋友、妻兒，真係非常大嘅羞恥！」

暗寸「弱者」博同情

子丹揚言應不會再與趙文卓合作：「我一直冇出嚟鬧過趙文卓，唔想變成炒作。最令我失望係事件延伸到各種是非、謠言、矛盾，我哋應該唔會合作。我覺得佢欠大家同事件中受傷嘅人一個道歉。」對於被指是「戲霸」，他說：「我一身傷病，每日瞓三個鐘，幾個月唔見家人，如果咁係『戲霸』，我認；如果某啲人扮弱者攻擊我，博同情，話我係『戲霸』，我就唔承認。」

另外，內地導演耿衞國（又名檀冰）的電影《終極譯碼》去年未能開拍，並指子丹搶走其電影項目，子丹澄清兩片完全沒有關係，並透露《特》片的編劇是其已故好友司徒錦源。他又直斥耿衞國是電影圈的不良分子，正等待法庭排期再次開庭審理。