韓國人氣組合2PM成員澤演與蘇怡賢、金在旭合作的韓劇《靈異愛情》（前譯：《Who Are You》），以女主角飾演的刑警見鬼調查靈異事件為題材，首度合作的澤演與蘇怡賢對於首場便拍咀戲也大呼尷尬！

澤：澤演　蘇：蘇怡賢　記：記者

記：劇中飾演刑警，事前有沒有為角色作準備工夫？

澤：雖然我要演一位刑警，但開拍前沒有特別去學武打動作，只有盡全力演好這個角色，同時又好享受每次拍攝動作場景。

記：覺得最辛苦是甚麼？

澤：我最記得要不斷地跑，真係跑到好累。

記：有冇用替身？可以分享多點拍攝經驗嗎？

蘇：拍攝動作場面時，我盡可能都唔會用替身，但片中有好多奔跑同追逐場面，所以我每次拍完都會筋疲力竭。

記：劇集以靈異事件為題材，你哋本身害怕鬼怪嗎？

澤：我本身唔怕鬼怪，因為我知道所有鬼怪都係演員扮演，而且我喺劇入面都唔係有好多鬼怪場景。

蘇：其實我好怕嗰啲恐怖驚慄嘅故事，雖然我明知一切都係虛構，但我都經常被嚇倒，所以我可以好真實咁演繹呢個角色，因為我真係驚！

記：現實中有冇遇過怪異事件？

澤：其實我本身唔太鍾意鬼怪同恐怖嘅故事，好彩至今都未試過有撞鬼經驗。

記：同澤演合作如何？

蘇：今次係我第一次同佢合作，剛剛開始嘅時有啲尷尬，因為同佢拍第一場戲就要拍Kiss鏡頭，真係好尷尬。之後大家變得熟落咗，拍攝時都好融洽、愉快，我喺劇入面被兩位型男同時愛上，真係好幸運。

記：同蘇怡賢合作又如何？

澤：我都係第一次同佢合作，開始時的確有啲尷尬，後來慢慢熟落咗，覺得佢好好人，會畀到我好多寶貴意見。

記：對香港印象如何？

澤：去年因為2PM演唱會去過香港，對香港夜景印象特別深刻，我最難忘係當時喺演唱會上好熱情咁支持我哋嘅香港歌迷。