擁有香港及西班牙血統的新人李安豪（Ivan），憑住一支結他、一把靚聲，自彈自唱於今年勇闖樂壇，成為跳唱組合HotCha的師弟。自言家境經濟欠佳的他，一直堅持做歌手的理想：「我由小五開始就鍾意彈結他，記得嗰陣賣緊三百蚊一支結他，雖然屋企負擔唔起，但我上到中學就搵到一份快餐店兼職，一放學就努力賺錢，好快就畀我儲夠錢，終於買咗一支七百蚊嘅結他，係最豪嘅一次，亦都係最開心嘅時候！」甚有音樂天分的Ivan，隨即自學結他，更晚晚匿埋廁所練歌，早前更坐爛屋企廁所板，他爆笑解釋：「因為怕嘈到媽咪瞓覺，所以一想唱歌，就拎埋支結他匿喺廁所，一路彈一路唱，之前仲坐埋喺廁所板上面彈，結果塊板就咁畀我坐爛咗！」

李安豪自爆求學時期努力兼職只為賺錢買結他。

李安豪今年以HotCha師弟身份勇闖樂壇。