最近翻唱經典金曲《歲月如歌》的環球新人AGA，憶述當年做空姐的辛酸，捱餓捱鬧實屬小事，莫講話見屋企人，連想搵個「Sam哥」依靠吓都冇，依家轉行做歌手，AGA索性跟音樂拍拖，笑言只有「超人」才能打動芳心。

AGA彈得又唱得，升呢歌手展音樂才華。

掛住玩音樂的AGA，想搵時間拍拖都唔係咁易！

AGA大談昔日做空姐的辛酸史。

樂壇新人AGA出身音樂世家，未出道前已為吳雨霏及薛凱琪作曲，閉關練功近5年，今年終於正式踏入幕前做歌手，剛在網絡平台推出新專輯的她，早前更翻唱陳奕迅的《歲月如歌》，跟「Cool魔」張智霖及同期新人許靖韻硬撼。

面對「正面衝突」，AGA拍晒心口說：「呢首歌的確太深入民心，所以我會用以前做空姐嘅角度去唱，希望畀大家另一種感覺！」提到以前做空姐的辛酸，她笑言確實經歷過「天氣不似預期」的日子：「試過喺上海遇到大霧，根本冇辦法起飛，啲乘客鼓譟就搵我哋出氣，真係好失落！」最終全體要落機滯留酒店，本以為事情完結，豈料最大鑊的是打開行李箱，竟然發現自己沒有帶食物，實在令人崩潰！

嘆遇不上「Sam哥」

問到可有幻想過跟情深款款的飛機師「Sam哥」交往？AGA二話不說：「唉！根本上就冇Sam哥，況且冇乜時間同機師溝通，太忙喇！」她又直言深感機長缺乏安全感，所以不敢有何幻想。談到擇偶條件，自封「宅女」的AGA說：「一直都淨係玩音樂，玩到斷六親，嚟緊又要做新碟，除非對方係超人啦！拍拖拍到好似異地戀就無謂。」