黎瑞恩退出樂壇多年，早前為好友湯寶如擔任紅館個唱嘉賓時不慎在台上仆倒，老貓燒鬚！提到今次到她舉行個唱，小恩子誓要收復失地，以長裙及長靴上陣，以免飛甩鞋！

小恩子下月將舉行個唱，繼續大玩飄逸造型。

黎瑞恩早前曾被裙腳絆倒，不慎跌倒台上。

退出樂壇多年的黎瑞恩享受做幸福少奶，未有懷念台上風光。

黎瑞恩闊別樂壇11年，將於下月29及30日在會展舉行兩場由馬天尼娛樂主辦的《金至尊珠寶呈獻黎瑞恩ALL FOR LOVE慈善演唱會2013》。小恩子表示毫無壓力：「其實11年前做完有少少失落，因為係第一次做，做得唔係幾好，但知道已經冇機會再做。今次可以再做，只希望唔會令觀眾覺得悶同睇得開心！」

數月前，小恩子在好友湯寶如的個唱中被裙腳絆倒，因而仆倒台上。她笑稱未有陰影，故無懼重蹈覆轍，要求歌衫同樣要夠飄逸：「我鍾意Bling Bling同飄逸，長裙先靚嘛！一定唔會話驚就唔着，最多小心啲，今次得兩級樓梯，冇問題！同埋我盡量唔着高踭鞋，全部着Boots，點飛都飛唔到出去啦！」她表示上次出師不利：「跌低嗰刻心諗：『搞咩呀！第一次出番嚟唱，點解會咁o架！』好彩嗰陣係Music Break，有啲時間畀我搵番隻鞋。今次應該冇事嘅，搵兩個人扶住我可能安全啲！」

從未後悔退出樂壇

問到她闊別樂壇多年，一直專心相夫教子，對五光十色的娛樂圈毫不眷戀，可曾懷念過台上風光？她說：「真係冇，出唱片好多嘢要考慮，既然咁煩就算。曾經好多人叫我出發燒碟，但唔係為慈善就唔會做喇，又唔係想繼續做呢行。」問到是否要再多等11年才會再舉行下次個唱？她不置可否地說：「唔知o架！不過短期內唔會再搞喇！」為家庭放棄唱歌的她坦言從未感到後悔，並透露仔女不時上網搜尋她的歌曲：「係同學啲爸爸媽媽話佢哋知我係歌手，佢哋唱歌都OK，可能真係有啲遺傳！（反對佢哋入呢行？）唔會，我會講晒利弊畀佢哋知，想試咪試。」