無綫小花樂瞳再以歌手身份闖樂壇，主打歌講述少女被不喜歡的男生獻殷勤，雖然內疚但仍繼續接受，道出90後欲斷難斷的愛情態度。樂瞳笑言讀書時也有「觀音兵」，但已很久沒有人追，就算Dry爆亦絕不會改變性格女追男。

雖然恨拍拖恨到出面，但性格保守的樂瞳拒絕主動出擊。

樂瞳的新歌講述對觀音兵的內疚心情。

樂瞳拍攝新歌MV時忍不住感觸落淚。

無綫小花樂瞳今年接連有三套劇集播出，包括《初五啟示錄》、《情越海岸線》及《師父．明白了》，曝光率甚高，但她未有忘記歌手身份，一直默默炮製新歌，早前終於推出大碟，曲風貫徹少男殺手形象，唱出90後對愛情及生活的看法。

其中一首主打歌《男生乙個》講述對「觀音兵」的愧疚，身為宅男女神的她當然曾有類似經歷，拍攝MV時更感觸落淚：「首歌講我有鍾意嘅人，但有個男仔依然願意做後備，令我好內疚。（你親身經歷？）讀書時都有，之前我有個拍咗拖好耐嘅男友，身邊仲有男仔聽我傾心事，又送禮物畀我，我唔知點面對，唔想直接Hurt人，盡量唔令佢覺得有可能，之後慢慢疏遠。」

錯過桃花年有排等

講到愛情，剛滿27歲的樂瞳依然單身，恨拍拖恨到出面，希望30歲時有個穩定男友，但她表示個性保守難有姻緣：「呢個世代女仔都好主動，但我唔會女追男，見到鍾意嘅人反而更冷漠，可能有男仔見我冇反應，好快放棄。（家人擔心？）冇嘅，媽咪叫我唔好咁早結婚！好耐之前蘇民峰師傅話我桃花年係呢兩年，但又唔係好覺，佢話錯過咗呢兩年又有排等，咁咪等吓囉！」問到會否改變性格主動獵仔？她即擰晒頭自認硬頸，相信上天自有安排。