組合農夫成員陸永口才了得，作風向來搞鬼，日前其愛妻泳娜23歲生日，他特意為老婆「度身訂造」生日蛋糕慶祝，更大賣口乖，認真識冧老婆！

陸永與老婆泳娜於2011年拉埋天窗，婚姻生活已有兩年，現已育有兩名Cute爆囡囡，一家四口過着幸福的生活。陸永經常化身湊仔公，在微博上載大女一穎及細女一心的可愛照片，可見這位爸爸多麼疼錫囡囡！向來識做的他亦絕不偏心，日前老婆泳娜農曆生日，他在微博上載抱老婆的照片，笑指這個深情擁抱是老婆的第一份生日禮物。

到了生日當天，陸永更為老婆「度身訂造」生日蛋糕，又留言氹她：「原本叫蛋糕師傅將我老婆整到有咁索得咁索，身材有咁誇得咁誇，點知整完出嚟一啲誇張感都冇，幾乎同佢本人一樣，真係個誠實嘅蛋糕師傅！我祝願老婆生日快樂，希望未來每一年我都可陪伴左右，好似蛋糕咁一家人開開心心。 」雖然陸永未有透露送了甚麼生日禮物，但有他「間接的讚賞」和特製生日蛋糕，相信泳娜一定感動到甜入心！