兩大視帝黎耀祥和陳豪在台慶劇《法外風雲》中大鬥演技，其中陳豪穿皮褸揸電單車扮少男，造型「驚喜」！與他舌戰連場的祥仔則中風，搞到歪面流口水！

祥仔在戲中與陳豪大鬥演技，更豁出去扮中風。

無綫台慶劇《法外風雲》以黎耀祥和陳豪的法庭鬥法作賣點，昨晚播出的一集，先以外籍比堅尼女吸睛，再來便是祥仔和陳豪的連場舌戰，鬥智又鬥力！兩大視帝的劇情對白不乏人身攻擊，其中陳豪窒祥仔矮：「Let me guess！5呎6吋？」又指他着名牌西裝衣不稱身，祥仔即氣憤地反駁：「係5呎7吋半！」此外，兩位年過40的視帝亦有不少Flash Back戲份，其中陳豪揸電單車上陣，穿上皮褸和戴黑框眼鏡扮少男，造型頗為嚇人。不過，仍不及因中風而歪面流口水的祥仔令人難忘，他不顧形象激情演出，大考演技！

坐輪椅鬥法

另外，祥仔和陳豪在醫院亦有不少鬥氣場面，好勝的兩人冤家路窄，雖然均坐着輪椅，但做物理治療時不忘互窒，陳豪見祥仔連站起身也困難，即得戚地輕鬆彈起身舒展筋骨，結果兩人齊齊跌倒地上。