莫鎮賢和張學潤這兩個加埋接近百歲的男人，因為心中的一團火，今年竟組成一隊新組合。正能量滿瀉的二人不怕閒言閒語，不介意做樂壇最老新人，希望與一眾「後生」鬥過，齊齊角逐頒獎禮的新人獎！

張學潤（左）與莫鎮賢齊齊與提供場地拍攝的老闆娘Linda（中）合照。

張學潤（左）與莫鎮賢不怕被指樂壇最老新人。

莫鎮賢（Kan）和張學潤（Nel Nel）相識廿載，在觀眾眼中前者是「發燒男聲」，後者是「時裝判官」，但原來Kan亦讀過設計，Nel Nel也有一把超級靚聲！

二人今年除了推出自家品牌外，更創作了一首合唱歌《不卑不亢》，反應出乎意料地好，令他倆「心郁郁」想殺入樂壇，Nel Nel笑說：「我係咪樂壇最老嘅新人？（夠唔夠膽去頒獎禮？）點解唔夠膽？唔係唱嚟做乜？我哋唱得好過依家好多新人啦！我個妹係百彈齋主，連佢都話好聽！」Kan亦不介意陪好友癲一次，他說：「我入行30年真係睇淡晒獎項，但對佢嚟講就好新鮮，佢擔心我哋係超齡組合啫！不過估唔到佢咁鬼勇，希望佢到時唔好逼我着裙上台就得喇！」

堅持理想 實現夢想

問到是否想以史上最老的新人組合打出名堂，Nel Nel笑說：「一定要有名o架咩？一係我哋叫NK48囉，好似AK48咁！再唔係叫『前列腺』啦！好多男人咁上下年紀都要面對呢個問題嘛！」引得Kan笑個不停，而這種正能量正是二人新歌想帶出的訊息，Kan說：「我哋就係想畀啲鼓勵大家，一個人多啲正能量，身邊發生嘅都會係好事，所以要Keep住保持正面情緒。」而Nel Nel直言他倆就是最佳例子：「好多人覺得到咗我哋呢個年紀已經玩完，仲可以有咩大作為？但係我哋要話畀大家知，只要堅持理想，仲有一個夢都可能會實現。要Keep住一路活得更好，咁先冇枉費做過人o架嘛！」