藝人湯怡日前現身旺角街頭，為香港電視新劇拍攝外景，並與劇中姊妹「蒲精四友」騷胸露腰兼捱夜排隊，在等埋位時，四女突然「港女」上身，舉起手機自拍，而大晒長腿的湯怡自認「飛機場」，還表示為劇集獻出「第一次」！

只騷長腿的湯怡，不覺比他人輸蝕。

湯怡（左起）、林熹瞳、劉依靜及黃欣在等埋位時興奮自拍。

湯怡、林熹瞳（Rachel）、劉依靜及黃欣等日前凌晨十二點，以性感露腿裝現身旺角街頭，拍攝香港電視（HKTV）新劇《Night Shift》，劇組請來近半百臨時演員漏夜扮排隊，霸佔半條行人專用區，隨即吸引廿多名途人圍觀。劇情講述湯怡為「男友」林文龍半夜排隊買Figure，而「蒲精四友」則出動陪她「捱眼瞓」。

當晚劇組Book了水車，製造落雨場面，在等待期間，四人「低頭族」上身，不停按手機及「煲粥」，炎炎夏日除了大汗淋漓外，四雙美腿更引來「鹹濕蚊」勁針，Rachel不禁拿出私伙蚊怕水止癢，而身旁的劉依靜則用手掩鼻嫌臭。之後四人開始「吹水」解悶，又發揮「港女」本色，喪玩自拍，認真貪靚！直至凌晨一時，警方接獲市民投訴聲浪太大到場，而劇組亦下令「靜靜」拍攝。

期間有街坊帶着兩隻大犬經過，四人即興奮地「眼(目及)(目及)」，Rachel更拍手「撚狗」，豈料導演即時喊Action，Rachel才收起笑容投入角色，非常專業。但她在Set頭補妝時卻不慎露出盆骨的假紋身。

騷長腿輸蝕

為該劇獻出多個「第一次」的湯怡，既要食煙又要與林文龍拍床戲，她說：「我不嬲唔食煙，唔吸得煙味，但今次食咗好多支煙，唔識點又唔識噴。有幕講我點煙，文龍喺後面攬住我，啲煙係咁攻我哋兩個，一Cut機我哋就喪咳，勁辛苦！」提到女拍檔們晒胸又騷腰，只露長腿的湯怡明顯輸蝕，她笑說：「大家係唔同嘅性感，我騷長腿。（唔騷上面？）我冇嘛，有我會騷嘅。（墊吓囉！）唔得，太假啦！」由於《Night》劇是全夜班戲，她直言熬到皮膚變差，朝早要敷Mask急救：「一唔敷就好乾同生暗粒，反而有時早收或放假瞓唔着，因為依家每朝7、8點先瞓。（文龍要食安眠藥？）我有考慮過，但最近我都係拍到6、7點先收工，所以返到屋企都瞓到。」