黎芷珊透明度高

主持黎芷珊去年主持無綫清談節目《最佳男主角》，邀得多位重量級影帝擔任嘉賓，節目受觀眾歡迎，口碑不俗，她更憑該節目榮獲《萬千星輝頒獎典禮2012》的「最佳節目主持」獎，今年無綫乘勝追擊，再力邀十位重量級女演員炮製長達35集的《最佳女主角》，嘉賓包括劉嘉玲、劉曉慶、楊千嬅、趙薇、袁詠儀、陳慧琳、葉玉卿、李心潔、吳家麗、葉童、楊采妮及羅蘭等等。

訪問時，黎芷珊與眾女星大談從影以來的心路歷程及鮮為人知的小秘密，問到會以甚麼秘密與人交換，她笑說：「我冇秘密換呀！我本身已經冇乜秘密，我嘅生活素來平淡，連有幾多個男朋友都係公開嘅秘密，我嘅人生幾乎係透明，反而啲訪問對象就好有信用，每人送我一個小秘密，有啲秘密令人難以想像，甚至相當震驚！」

付出眼淚 投入感情

問到訪問「男主角」及「女主角」有何分別，她說：「我訪問嘅男主角多數都同我有交情，我諗同期成咗名嘅人會覺得我可憐，捱到今日都仲係記者仔，或者佢哋係可憐我啦！到做女主角訪問時，我開口問到，佢哋就一口答應，已經唔係因為可憐我！」問到是否因她是知名主持所致時，她說：「咁我又冇呢個感覺喎！我其實係個好眼淺嘅人，喺感性時刻，我會好投入，會陪埋嘉賓一齊喊！做呢個節目，我都有付出眼淚同感情，大家都能交心對話。」