田蕊妮在新劇《巨輪》中由20歲演到50歲，經歷數個年代洗禮，不諱言「巨輪」儼如自己的人生，與老公杜汶澤一同經歷巨變後，在宗教信仰幫助下比從前更珍惜對方，更指非經歷過也未必能勝任《巨》劇角色。

田蕊妮不諱言與老公杜汶澤一同經歷巨變後，更加珍惜對方。

由拍拖到結婚，阿田付出的愛從沒想過要回報，問到是否不需要杜汶澤保護，阿田笑說：「佢都有，出糧啲錢畀晒我，但我性格唔慣使老公錢，有幾年冇做嘢都係使私己錢，試過老公幫我找卡數，但我感覺唔太好，佢有錢佢嘅事。」

阿田透露雖然掌管老公財政大權，但未有動用對方一分一毫，只默默看管戶口進展，每月向老公匯報及發放工資，她笑說：「試過唔記得出糧畀佢，佢都會借啲意問我。（阿澤大使？）都OK，我每個月畀15,000蚊佢，佢有時會懶得戚話我知佢儲到錢，但又唔知佢好多嘢碌咗卡。」